香港即時娛樂新聞網
娛圈單打︱此地無銀三百両 曲線認愛惹遐想
來源 : 東方
更新 : 2024-07-24 00:04
![](https://hk.on.cc/cnt/entertainment/20240724/photo/bkn-20240724000116262-0724_00862_001_01s.jpg?20240723233751)
韓劇《淚之女王》在亞洲造成轟動,男女主角金秀賢和金智媛亦藉着人氣搵真銀,密密舉行粉絲見面會吸金。金秀賢早前到訪台灣,前腳剛走,「老婆」金智媛後腳又至。湊巧地,金秀賢在IG上傳新相,竟被指為跟金智媛認愛的證據,堅唔堅啊?
相中一身短Tee短褲打扮的「白女婿」,正在悠閒地低頭食雪糕,背景是台北一間咖啡店。本來都冇乜特別,但因為相片上載時間,分毫不差係「老婆」金智媛在台北舉行見面會的開場時間,加上背景寫着「台北+we support」字眼,support韓文發音和智媛名字發音相近,因而被認定公開放閃。粉絲興奮留言:「愛意藏不住!」、「有夠故意的但我喜歡!」
其實,今個月初金秀賢曾在IG上載自拍照,被發現動作與角度,跟金智媛在台灣宣傳的自拍照極為相似,掀起網絡熱議。金秀賢事後急急刪相,顯得此地無銀三百両,似乎真係有啲嘢喎。
話時話,金秀賢出道多年,從未官宣交過女友,但今年3月,「醉駕女星」金賽綸忽然在IG晒出跟金秀賢頭貼頭親密合照,緋聞不脛而走,惟經紀公司嚴正否認。詎料上月一個音樂節,又被攝得跟前女團I.O.I成員林娜榮親暱耳語。究竟今次Po相,是否力證金智媛先係「正印」,引起無限聯想。
即係咁,金童玉女外形相襯,若然走在一起,肯定獲得全世界祝福。不過,金秀賢成長於破碎家庭,不知會否影響其愛情觀?此外,他跟男星丁海寅非常老友,後者又曾被踢爆喜愛偕友人到私竇「搵小姐」,希望呢位友人唔係白女婿啦,呵呵!
已複製