香港即時娛樂新聞網
娛圈單打︱畀錢學做女人 搵笨定係吸引
來源 : 東方
更新 : 2024-07-27 00:04
![](https://hk.on.cc/cnt/entertainment/20240727/photo/bkn-20240727000100954-0727_00862_001_01s.jpg?20240726230358)
「花曼」王君馨(Grace)自離開TVB後搞作多多,除咗變身跳唱女歌手「G.Racie」外,最近更創辦學院,親自上陣教授「女人訓練班」!短短7日課程索價接近兩萬蚊,認真不菲,唔知上完堂,係咪即刻變成花曼咁索,打得又睇得呢?
Grace話喎,開辦學院旨在激勵女性,從化妝、髮型、造型、儀態、步姿、溝通六大方面提升自信。即係咁,Grace本身係港姐亞軍,樣貌身材出眾;出道初期被評為花瓶,但努力改進演技,《城寨英雄》花曼一角光芒四射,正是其代表作。
咁仲唔止,佢憑此角展露好身手,其後的《鐵拳英雄》亦有武打場面,唔止花拳繡腿咁簡單。「舞功」同樣有番咁上下,早在《舞動奇跡II》已一鳴驚人。離巢後轉型做跳唱歌手,證明歌藝亦見得人,加上同老公結婚8年依然恩愛,的確係女人典範。
之但係,課程收費萬八,網民就嫌貴,仲問憑甚麼?「佢係咪覺得自己好正,啲人要向佢學習?」、「欺騙訓練班」!計本欄話齋,提升自信課程萬變不離其宗,無非灌輸正能量,實行自我催眠;而香港男少女多,確係有唔少待嫁女士,期望透過改造提升競爭力,TVB N年前的《盛女愛作戰》都係咁上下嘢。藝人憑知名度吸金無可厚非,值唔值就見仁見智,但Target唔係一眾窮L網民就好肯定!
講到尾,Grace係就係內外兼備,但演藝生涯始終未如人意。TVB時期,等極做唔到女一;離開娘家亦未見突出,星途載浮載沉。唔少藝人都懷住怨氣離開,扭盡六壬只為證明大台走寶咋。
已複製