曾國城被控鹹豬手摸大髀 受害女星為黑澀會美眉

台灣資深主持人曾國城早前捲入失言風波，因支持黃子佼復出而遭狂轟，如今佢再被台媒爆料指，佢曾對一名女星伸出鹹豬手。有傳曾國城聲稱順路駕車送女方回家，途中卻伸手摸女星大腿，有網民推測該名受害女星為《我愛黑澀會》美眉Albee。 據報道指，當時曾國城放工後以順路名義載女星A回家，當時兩人有說有笑，曾國城突然伸手摸女方大髀。女星A表示對方是前輩因此不能撕破臉，只能向好友哭訴，其後事件被傳開，後來女星A被節目製作單位當場辭退。 據了解Albee曾擔任曾國城助理主持，有網民翻出Albee於2018年時無預警請辭節目，惟Albee近日首度發聲澄清，表示冇摸大髀呢件事，而佢冇繼續主持係因為當時同公司合約已經結束，直接否認遭曾國城伸鹹豬手。不過，其實Albee後來冇再擔任節目主持，但仍有現身節目中擔任嘉賓。 而節目製作公司華視亦針對今次風波回應，已立刻要求製作單位向當事人了解，當年主持人疑似不當言語舉措事件，稱了解來龍去脈都係希望事件同爭議可以盡快告一段落。