姜濤愚人節嗌退圈被黑粉轟 193護兄弟現身擋子彈

男團MIRROR成員姜濤早前趁愚人節（1日），喺社交網度同大家開個玩笑，留言稱下世唔想再做藝人：「希望下輩子 不會再是藝人 #愚人節快樂」本來係講吓笑當應節，點知一石激起千重浪，有大批不明所以嘅黑粉即刻衝出嚟，狂鬧佢如果唔想做藝人，當初就唔好參加選秀入行，亦有人轟佢呢個行為係對粉絲不負責任、身為公眾人物唔應該放負等，罵聲一片。 此舉竟引得姜濤激罕回覆網友，直言對方太認真：「兄弟你太認真了⋯⋯而且下世體驗吓第二啲人生唔係幾好咩~咁都要俾你鬧😅你壓力好大喎」點知講多錯多，黑粉打蛇隨棍上，仲拖埋佢好兄弟193落水，指佢學咗有「Haters教育家」之稱嘅193咁，唔覆Fans，反而回覆haters，仲問佢係咪畀咗個Account 193幫佢出post，寸味極濃。眼見好兄弟社交網淪罵戰場，193亦親自現身，為兄弟「擋子彈」謂：「對哦，我是姜濤～我跟193交換帳號玩啦」最後搞到佢都被網友鬧埋一份。