洪卓立廣州宣傳 突襲師妹戰金意busking千人逼爆廣場

洪卓立今個月19日，將到中山巡唱。 洪卓立（Ken）去年開始於內地舉行「The Other Planet巡迴音樂會」，先後完成東莞、江門及佛山站，場場爆滿。今個月19日，Ken終於迎來巡唱終極站 - 中山，宣傳期間他突襲師妹戰金意的廣州Busking現場，結果引來過千人圍觀，場面墟冚，嚇到自認「社交恐懼症患者」（i人）的Ken大叫：「完全嚇親！」 洪卓立廣州宣傳 ，突襲師妹戰金意busking。 Ken指自己甚少Busking，首次兼對上一次已經要追溯到跟謝霆鋒、陳偉霆及鍾舒漫在銅鑼灣時代廣場下面唱街頭，今次再戰Busking，他坦言：「都幾尷尬嘅，哈哈，因為嗰個感覺同喺台上面唱歌唔同，氣氛亦都好唔同，有時可能未必揀到一啲比較有故仔性嘅歌去唱，反而可能會揀一啲氣氛多啲嘅歌去唱。」Ken又謂在他心目中，這次是一個很簡單、小型的Busking，以為「唱兩隻歌就完。」但在後台等待時，看到過千觀眾及歌迷，頓時嚇親，「完全嚇親！冇估到咁多人！本身安排咗唱兩隻歌，但唱完之後其實我係唔好意思走，因為真係太多人好早已經喺度等，有啲搭兩個鐘頭車嚟，我覺得搭兩個鐘頭車嚟到，我唱兩隻歌咁就走，覺得好似唔係咁好，所以就清唱多一隻歌，希望佢哋會滿足滿意，覺得係值得嘅。」提到今個月19日的中山尾場巡迴音樂會，Ken興奮預告會「回歸地球」，「主題係『洪卓立』，意思係今次應該會唱晒自己嘅歌，冇cover人哋嘅歌，純粹係一個『洪卓立』嘅以歌會友嘅一個音樂會。」他又透露雖然今次巡迴反應十分好，但堅決唔做part 2，又預告有新作品推出，「我希望有一個新嘅題材走出嚟，做完呢一個尾站之後，陸陸續續會有新嘅作品同大家見面，有新嘅MV，希望有一個新嘅題材嘅巡迴，同大家再見面。」 【立即參加】送香港迪士尼樂園一日門票！