屯門湖景邨儲物室藏逾10貓傳惡臭 貓主為清潔商主管 街坊批房署縱容不管

屯門湖景邨湖畔樓地下一個儲物室，今（19日）早上9時41分，警方接報指儲物室內藏有一批貓咪，懷疑遭受殘酷對待，警員到場開門了解，驚揭儲物室內養了逾10隻唐貓，貓糧已絕，室內無窗、無燈，不見天日，貓屎滿地，發出惡臭，衛生環境惡劣，其後聯絡貓主到場，將其帶返警署調查，而愛護動物協會亦奉召到場檢走貓咪。刑事調查隊探員稍後接手案件。有份報警的毛守義工阿Kent指，早在一周前，有貓義工向他表示，懷疑該儲物室養有很多隻貓，該處是密封房間，門罅只能放一支很幼的鉛筆，義工發現內裏貓聲很嘈，他們曾將牙籤放在門罅測試，若有人推門而入，牙籤必掉下，結果發現五日五夜無人進內，即貓咪多日沒有人理會。他說：「裏面冇窗，冇燈，傳出惡臭，好似阿摩尼亞，醃眼，鐵門密封，街坊曾用卡紙揳入食物，一揳入去，啲貓就打架，好似好肚餓爭食咁，我哋覺得有殘酷虐待動物成份，今日報警求助。警察一開門，至少有11、12隻貓仔衝出嚟，佢哋皮膚麻麻，咪晒眼，儲物室內應該冇晒貓糧，全部都係雜物，幾塊板上面全部係貓屎，充亞摩尼亞味，有盆水，但好污糟，放咗好耐。呢間房據講係外判清潔商主管用的，好多人都知道養咗貓，但冇處理。」有街坊指，以往經常見有3至3隻貓在天井走來走去，不時有街坊投訴，但無人理，亦曾有街坊向貓主好言相勸，着他為貓咪做絕育手術，但對方態度惡劣。有街坊估計貓主不肯為貓咪做絕育手術，是有人刻意繁殖買賣。「重點係你唔係就咁養幾隻貓喎，儲物室環境差，冇窗冇燈，發出惡臭，我哋監測過五日，冇人開過門理過啲貓，又唔幫啲貓做絕育，懷疑有人私底下賣俾啲舖頭，儲物室係房署地方，唔可以養貓，投訴過又唔理，房署應該關注呢件事！」