現場實況： 鄭秀文邀王丹妮合唱《壞女孩》向梅艷芳致敬 提攜鼓勵後輩陪練歌 獲讚是理想對象

【Viu】Sammi鄭秀文嘅澳門演唱會噚晚嚟到第五場，請到Louise王丹妮做嘉賓。當年Louise演出電影《梅艷芳》，獲得Sammi支持同鼓勵因而結緣。Louise感恩Sammi提拔，表示之前試過喺電影中登台唱歌，今次以個人身份踏上舞台同Sammi合唱，心情無比興奮。佢又認為同Sammi一齊唱梅姐嘅《壞女孩》別有意義，「深深感受到我哋對梅姐嘅敬愛之情！」除咗同Sammi合唱《壞女孩》之外，Louise亦獨唱Sammi嘅作品《理想對象》，「呢首歌係我親自揀嘅，因為除咗我之外，我知道好多歌迷都視Sammi為理想對象，所以我唱出大家嘅心聲。」為咗今次表演，Louise專誠搵唱歌老師練歌，仲不時提醒自己，表演嘅時候唔好太緊張，盡情同Sammi一齊享受舞台。令Louise最難忘嘅係，Sammi竟然從百忙中抽空同佢排練，「呢種精神真係好值得學習，respect！我希望除咗舞台表演外，將來可以有機會跟Sammi一齊拍電影。」表演完畢後，Sammi大讚Louise表現淡定，而且好有台型，令Louise開心不已，仲告知Sammi，除咗佢之外，老公羅孝勇、囡囡，長居澳洲嘅老爺奶奶都有同行，皆因全家都係Sammi嘅忠實Fans！ 瀏覽 Viu網頁觀看影片 
 瀏覽 Viu網頁