郭富城拉頭馬 愛駒未過終點已舉手擺定Pose

天王郭富城熱愛賽馬運動，不時帶同妻女入場為愛駒打氣，而他所養過的愛駒亦屢獲佳績，今日（18日）他的新貴「舞林寶典」來港已一段時間，經歷多次傷患後終於首次出賽，城城單拖到沙田馬場支持愛駒，賽前為大熱門的「舞林寶典」亦不負所望，成功跑第一，於看台上觀戰的城城見到愛駒氣勢強勁，未過終點已經信心十足，舉手擺定Pose等影相，認真識做！ 城城受訪時表示：「『舞林寶典』來港後操練受傷，傷完右腳再傷左腳，加上唔太適應水土，用咗一段時間養番好傷，今年年初已想安排愛駒報名出賽，但愛駒試閘後又再有少少傷，一抖抖咗幾個月，但自己可以等佢好番。」又指愛駒跟自己精神相似，自己跳舞時都有受傷，但好番都會再上舞台跳舞。