娛圈單打︱靚女嫁着爛滾佬 畀人食硬真老土

現年37歲嘅日本女星佐佐木希，17歲甫出道即以驚人美貌走紅，被譽為「日本第一純情美少女」。女仔人家戀愛大過天，2017年下嫁大佢15歲嘅諧星渡部建，迅速誕下一子，點不知老公唔生性，竟然鬧出震驚全國嘅「日版殘廁Gathering」事件！事隔多年，希妹坦言未能原諒老公，可惜講出嚟都冇乜人同情喎。 渡部建就巴閉咯，2020年一夫戰六女，仲喺殘廁打野戰，當時佢同希妹個仔得兩歲咋，事件被踢爆後舉國震怒，人人喊打！衰佬隨即公開道歉並全面停工，但依然未能平息輿論怒火。男人冇擔當，最好推個女人出嚟擋！希妹未幾即透過社交網發文，向全國道歉，表明兩公婆會一齊面對困境，拒絕離婚。 唉，個女人都咁講咯，其他人都無話可說啦，結果個衰佬沉寂一輪後重新活躍，家陣又係一條好漢！希妹甚至再為老公添丁，大家都大嘆呢個女人真係忍得！冇計啦，愛情係盲目嘅，囝囝又咁細，頭家散咗嘅話，小朋友都好慘啫。 嗱，老公自己揀，PK唔好喊。希妹近日受訪，舊事重提，坦言至今未能原諒老公！仲話呢段婚姻能否繼續，目前仍在觀察！唓，當初你選擇啞忍，今日仲講乜嘢未原諒喎，食得鹹魚抵得渴，個衰佬擺明食硬你，邊值得人同情吖。 有時真係唔明，日本女明星幾靚幾紅都好，偏偏對其貌不揚嘅諧星情有獨鍾。例如鈴木保奈美、藤原紀香都下嫁諧星，但最終離婚收場。天下烏鴉一樣黑，醜男分分鐘滾得仲勁過靚仔呀，咪見諧星喺藝能界地位崇高，就盲舂舂衝埋去先得㗎！