姚焯菲遊樂園做返小公主 緊身Tee露腰愈大愈索

「聲夢小花」姚焯菲（Chantel）早前完成13場音樂劇後，趁本月12日偕鍾柔美、詹天文在廣州舉行《Time To CYA》演唱會前，先稍後休息放鬆一下，重遊主題樂園，再做多次「聲夢小公主」，不過她的「城堡」並非在香港而是上海，同行還有跟她一樣靚女的女友人。 身穿緊身露腰上衣襯黑色短裙的Chantel，身材愈大愈豐滿，不過面上依然稚氣不減，孭着毛公仔背囊踎在圍欄邊影靚相，因太陽太猛烈關係，曬到她面紅紅，顯得特別可愛。她還遊覽了著名景點黃埔外灘的九江路，一睹百年建築物的宏偉，當然為食的她不會錯過馳名的蟹黃拌麵，隔住個Mon齋睇都令人食指大動。 另外，她又在社交網重溫音樂劇的幕前、幕後花絮及相片，留言謂：「好似發咗場美夢，有諗過Jukebox Musical（《三‧八音樂劇》）可以咁好玩，真係好唔捨得，感謝所有台前幕後，開心認識到你哋每一位，我會永遠永遠記住」，似乎Chantel演音樂劇已演上癮了。