雲浩影電車慶生顯氣派 鄧麗欣現身送驚喜

歌手雲浩影（Cloud）將於8月2日假旺角麥花臣場館舉行首個個人演唱會《Finding Cloud 雲浩影演唱會2025》，上周預訂火速售罄，明日（3日）作公開發售，日前Cloud舉行遊電車河宣傳造勢，出發前獲「迷雲黨」（粉絲暱稱）送上生日蛋糕，預祝周六（5日）生日快樂及個唱門票大賣，師姐鄧麗欣（Stephy）並突然現身爆驚喜。 Cloud看到粉藍色為主調的電車，感到好開心，坦言之前擔心處女騷銷情，終於鬆了口氣，她說：「話晒係我人生第一個演唱會，好想大家一齊見證呢個特別嘅moment，預售嘅時候好快賣晒，好開心亦都鬆咗一口氣，因為我有擔心過售票嘅反應，所以好多謝大家支持。」現場有數十位「迷雲黨」一同大合唱生日歌及送上黑膠唱機造型的生日蛋糕，Cloud表示好感動。DJ謝茜嘉問粉絲是否期望Cloud推出黑膠碟？粉絲們表示希望，Cloud就笑言：「我本身無黑膠唱機，呢個係我今年第一個生日蛋糕，同埋第一個唱盤。」 電車由屈地街電車廠出發，向銅鑼灣方向行駛，神秘嘉賓Stephy就在上環登車，靜靜地走到Cloud身後，Cloud發現後開心得跳起，掩嘴傻笑，Cloud即場向Stephy請教如處理開騷前的緊張情緒？Stephy教路：「其實每個人都會緊張，即使好有經驗嘅前輩都會演出前緊張，正常㗎！」Cloud表示在Stephy面對會感到開心又緊張，不知說甚麼才好，笑言明白做粉絲的心態，她說：「真係好驚喜，我畀佢嘅靚嚇親，好開心有位大前輩嚟為我打氣。佢好明白我第一次做演唱會嘅心情，對於我嚟講有幾重要同埋緊張，佢同我分享咗好多經驗，我好開心有一個同Stephy一對一對話時間。原來佢都會緊張，知道之後我反而淡定咗少少。因為我印象中嘅Stephy係非常淡定、唔會緊張，知道原來佢都會緊張嘅時候，我就發現自己都係好正常，最緊要點樣將緊張同埋壓力，變成動力令自己做得更好。」