港姐複試︱超絕高級臉顛覆審美 慌失失四眼妹貓紙傍身

今屆香港小姐第二輪面試今日（4日）舉行，除多位仙氣十足嘅美女相繼現身電視城外，今次仍見到驚嚇「猛將」，形形色色任君選擇。 由加拿大回港嘅海外佳麗李慧雯氣質獨特，一雙單眼皮及「無眉娘」Look甫現身即吸引目光，疑似未有化妝上陣嘅佢，以真面見示人，勇氣可嘉，再配合其高級超模臉，雖然同往常港姐審美大有出入，但無阻佢爭入圍嘅心。 來自英國、18歲Iantha青春無畏，雖然化咗靚靚妝容，但就配上大大副眼鏡遮蓋美貌，未能睇清其美人胚子，佢於的士下車時更險走光，性格似乎幾慌失失。佢用廣東話同現場人直講「你好」時，又被發現準備好拼音貓紙，明顯有備而戰免失禮。 澳洲讀Marketing碩士、26歲黃心怡，由媽咪陪同到場，全程阿媽傍住，Auntie更開心同囡囡合照，未有懼怕媒體鏡頭，似乎母女都愛上鏡。