港姐複試︱「翻版莊子璇」入圍戰兩大環球小姐 參賽者夠胸猛

今屆香港小姐第二輪面試今日（4日）舉行，索女佳麗繼續出動，多位大熱亦相繼現身，美女如雲花多眼亂。當中剛退選「亞洲小姐」嘅許詠詩（Joyce）順行入圍，27歲嘅佢自爆剛過生日，生日願望之一就係可以順行當選，參選過香港區「環球小姐2024」嘅佢信心十足。另一「環球小姐」陳澄倩（Jasmine）上次同許詠詩一齊着白色裙，今次就一齊以黑色高質裙示人，報稱27歲、身任瑜伽老師嘅佢，曾豪言會入三甲，今日進入複試可謂成功在望。 「翻版莊子璇」陸凱殷（Victoria）好高興被指似前冠軍莊子璇，覺得有關注度，今次以白色Low cut連身裙現身，唔再打造「純純兔」形象，甚具睇頭。被封為「翻版劉佩玥」嘅陳詠詩亦有現身，再次獲富爸爸揸名車接送，佢表示開心有網民關注：「會喺舞台上表現自己，對自己有信心，會表演體操。」其社交網友見上載大批福利圖，雖然佢兩次見人均收埋巨胸，不過私下靚相張張吸睛，相當噴血。 上次以藍色旗袍上陣嘅陳曉籃，曾表示會以多條旗袍展現東方美，今次佢就有口齒以粉紅色旗袍出動，美態盡現。中央戲劇學院學生「巨胸Vivian」則繼續低胸示人，一身胸猛Look加上手上價值18萬名牌手袋，力撼多位入圍佳麗。獲黃曉明提名嘅朱卓盈，第二次參選港姐終得償所願入複試，佢直言曉明哥對佢好大期望，頂住「黃曉明心水」光環對佢好有幫助。 另外，「大鼻陳茵媺」Victoria、中英混血兒施宇琪（Angela）、25歲教大碩士譚可怡等靚女均有入選複試。