港姐複試︱驚見退役女兵 長腿Belle「老翻炎明熹」齊入圍

選美盛事《2025香港小姐競選》今日（4日）舉行複試，今早多位佳麗已傾巢出動，到下午時間終於正式見傳媒。受大眾關注嘅「翻版劉佩玥」陳詠詩（Stacey），被問到身材強勁是否有優勢？佢表示由細到大都做體操，更係香港體操隊代表：「13歲就加入，日日練5小時，一個星期練30小時，由細到大練習變咗肌肉。」更自爆其提名人係20年前嘅港姐，身份神秘。 「長腿Belle」譚可怡就自爆昨日過生日，依家已經25歲，今日穿金戴銀現身，其社交網則晒出水底跳舞片，似乎相當有實力。「翻版莊子璇」陸凱殷（Victoria）表示自己知邊個係莊子璇，被問到覺唔覺二人似樣？佢未有回答，當問到佢靚啲定莊子璇靚啲？佢則拋下一句「多謝」回應。「老翻炎明熹」袁文靜亦同樣有得見人，27歲嘅佢指自己同英國威廉王子讀同一間大學，現任職Program Manager。 「岳飛後人」岳凡荻被問到作為岳飛後人是否有優勢？佢表示仲要睇自己表現：「不是看家族，我有信心。」「黃曉明心水」朱綽盈現為大律師，佢話希望可以攞到好名次，同黃曉明喺內地拍綜藝節目認識，識咗兩年幾：「係我好朋友同好敬重嘅前輩。」莫凡（MOLLY）曾任國際新聞編輯，現已辭職，被指似張曦雯時，佢即賣口乖：「佢好靚，似佢係榮幸！」 眾佳麗中，更見退役女兵劉維斯今早帶埋豆腐花做早餐，佢表示自己曾服役2年，現為浸大碩士：「覺得每個人都要有愛國心，是好事，負責發射導彈的崗位。」27歲梁倩萱做金融，原來其妹妹梁倩淇為2023年15強港姐之一，不過今年妹妹不在港，就猜冇再參加，今次自己嘅提名人係TVB藝人。 挾「退選亞姐」及「環球小姐」頭銜嘅許詠詩（Joyce），對被外間指為大熱，佢表示交畀觀眾眼睛判斷，而剛踏入27歲嘅佢今次搭上港姐尾班車？佢表示：「希望捉緊機會，要繼續努力。」