娛圈單打︱開畫展慘遭恥笑 妒忌係毫無意義

喂呀，貴為星二代，唔止繼承父母優良基因，外形出眾，所獲資源仲非常豐富，羨煞旁人，呢啲咪叫做贏在起跑線囉。呢，好似台灣女星小S個寶貝女許韶恩（Lily），17歲女之嘛，已經開咗人生首個畫展，仲獲得一眾明星姨姨力撐，自掏腰包購下畫作！ 正所謂不招人妒是庸才，Lily年紀輕輕展現藝術天賦，口臭嘅網民就提出諸多質疑，話佢嘅大作，明抄日本大師奈良美智嘅「大眼女孩」，同埋港產藝術家龍家昇嘅Labubu喎。Lily只肯承認藝術風格深受奈良美智影響，結果竟然引來奈良本尊喺X回應，寫下「受哪個藝術家影響？」再加3個狂笑Emoji！ 嗱，根據AI解釋，呢個狂笑Emoji有「嘲笑或揶揄」意味，亦有一種「尷尬但又忍唔住想笑」嘅感覺，難怪奈良老師嘅回應一出，隨即惹來網民瘋狂解讀！唔少人覺得老師係取笑緊Lily喎，認真耐人尋味！可能有見輿論不斷發酵，奈良老師再出貼文補鑊，強調只係開心有人受自己影響啫，仲特登以繁體中文寫出，慌死大家唔清楚咁。 本欄就覺得，妒忌係冇意義嘅，話明係星二代，梗係同一眾凡夫俗子完全唔同啦，冇番一個咁有名氣嘅老媽子，其他人識你係老鼠咩，死窮L唔恨得咁多。 至於奈良老師係咪意有所指，你諗你啦。即係咁，奈良老師留學德國多年，直到40歲先至成名，今年65歲啦，首獲《時代雜誌》選為全球最具影響力100人之一。Lily 17歲就開畫展，可能連奈良老師都好佩服呢！再講吖，Lily青春無敵，將來成就無可限量呀！