林宣妤拍處女電影 返無綫拍劇唔到佢揀

馬來西亞女神林宣妤今日（6日）出席電影開機，她透露今次是首次拍港產片，角色主要負責查案，沒有感情線。現時自由身的她會以香港為工作基地，問到娘家無綫有否找她拍劇？她坦言：「暫時未有。其實無論電影或電視劇我都想試多啲，好似今次嘅角色都未試過。（想唔想返無綫拍劇？）有戲開已經好好，我唔會揀。」講到感情生活，之前在社交網跟舞台劇演員劉俊堅高調放閃的她表示：「好穩定，好開心。」 同片的譚耀文與導演邱禮濤亦有現身，兩人表示多年前已合作，阿譚大爆往事：「我以前仲未入行，同同學好鍾意去尖沙咀一間咖啡店飲嘢扮文青，喺入邊就遇到真文青，佢就係導演。」他透露今次在片中飾演鑑證科人員負責查案，問到感情線，導演笑言有幾條、好複雜，問到是否有男有女？阿譚叫大家估吓：「總之題材幾特別，相信會引起好多話題。」 談到現時電影市道差，問到是否很難開戲？導演坦承：「係難，但我入行40年，今年嘅寒冬唔係最凍，以前金融風暴、沙士、科技股爆破個氣氛比依家仲差，再早仲有翻版碟問題。（戲院結業潮，對你哋係咪好大影響？）有影響，身為電影從業員加上又係鍾意電影之人，感覺係悲哀。（依家係咪好難搵投資者？）係難，但對我嚟講從來冇易過，拍戲辛苦係正常，但我哋就係鍾意辛苦。」