黃博張與辰密密出騷 直認收入大增

歌手黃博、張與辰、譚輝智、姚焯菲、詹天文、林智樂及張馳豪等譚現身將軍澳，出席慈善活動記招，吸引大批粉絲到場應援，場面墟冚，叫囂聲此起彼落。 黃博與張與辰孖住受訪，被問到近日經常出騷，兩人異口同聲表示多謝公司給予曝光機會，亦認為是很好的學習，不過他們坦承休息時間相對驟降，黃博透露昨晚休息了6小時，而張與辰則指平均每晚睡4個鐘：「都慣咗，想用多啲時間做嘢。（想唔想放吓假？）早兩日放咗啦，朋友拉隊去澳門食吓嘢同睇騷。」 黃博表示都有爭取時間同老公相處：「嚟緊有機會我哋都想去睇吓戲，好彩佢冇投訴，反而好支持。（冇時間做家務？）抽到窿窿罅罅嘅時間，都會盡量處理面嗰層，做啲基本嘢。」不過她與張與辰都坦承收入增加不少，問到翻了幾多倍？張與辰笑答：「未敢計住。（買啲乜獎勵自己？）買咗幾萬蚊衫嘞。」黃博則指最開心便是與老公四出食好西：「有時會買啲海鮮返屋企整，已經好滿足，比較鍾意咁樣嘅生活。（唔買嘢？）都想買吓衫，出騷可以用。」