足本訪問：Tyson赴意大利完婚 獲過百粉絲拉橫額賀告別單身 受《幪面超人》啟發影爆破婚照 軒公答應「插水」嚇窒全場 欲推林家謙簽英皇「填氹」？ 質疑爆粗VIP觀眾飲大咗

【2025年7月7日】Tyson Yoshi今晚啟程去意大利舉行婚禮，獲過百Fans以演唱會嘅斗篷Look兼拉Banner送機，熱烈祝賀浚彥告別單身，場面熱鬧得嚟，Tyson就笑言有啲小尷喇！而好兄弟軒公、Madboii、Teddy Fan亦同機赴意大利參加婚禮。 Tyson入閘前受訪親解爆破婚照嘅原意，原來真係向《幪面超人》致敬㗎，仲笑言如果有電單車牌，一定飛埋車。不過，Tyson就解釋一早講好同Christy一人一輯婚紗相，所以老婆都冇詐型，婚禮後就會陪老婆影靚靚婚照，仲話會交出「營業mode」，當平時開工影雜誌咁喎！ 講到好兄弟軒公同林家謙都為佢「破處」插水，Tyson就還原叫軒公插水嚇窒台前幕後嘅爆笑經過，最搞笑話如果軒公有乜差池，就推林家謙簽英皇填氹，又話下次會叫Fans「摩西分紅海」，等林家謙直接撻落地，仲爆林仔好孤寒，一定唔會請程細妹睇騷！ 至於網友最擔心嘅乳頭，Tyson就話冇被搣損亦冇變黑，力保Pink Pink，又自認搵「兇手」時惡得滯，仲回應埋熱爆Threads嘅VIP觀眾爆粗投訴冇派斗篷一事，想知就睇足本訪問啦！ 瀏覽 Viu網頁觀看影片 瀏覽 Viu網頁