娛圈單打︱終於有戲見得人 畢佬賽車型到暈

喂，沉寂多時，荷里活終於有大片見得人啦！直情睇到腎上腺素急升、熱血沸騰！咁緊要？係呀，61歲嘅畢彼特回勇之作《F1電影》，賽車場面精彩，劇情夠爽，好睇！ 今年3月電影公司釋出海報，畢佬一身貼身賽車服下結實嘅肌肉，令人垂涎欲滴，本欄曾撰文表示期待。如今終於上畫，果然冇令人失望！片中最精彩，梗係F1賽場上實景拍攝嘅場面，將人類對速度嘅追求發揮到極致。建議必須入場睇IMAX版，咁樣先至最好Feel！ 電影技術團隊採用3機並行拍攝方案，主力係Sony VENICE 2攝影機，搭配專為本片開發嘅Sony 6K原型機；最令人驚訝係用iPhone 15 Pro改造成賽車專用攝影機，經受得起攝氏60度高溫車廂環境，同埋時速300公里以上嘅氣流衝擊。電影仲有7屆F1冠軍咸美頓充當顧問、監製兼客串，非常有噱頭。 劇情方面又點呢？只要大家知道，本片導演就係靚佬湯《壯志凌雲：獨行俠》嗰個，大概都估到成套戲嘅套路：寶刀未老嘅過氣老鬼重出江湖，天才新一代由睇佢唔順眼，到後來變成最佳拍檔咁囉。片中仲有兩代矛盾嘅有趣對白，包括後生仔見到老屎忽，一律當佢係扮晒大支嘢嘅80歲阿伯；老屎忽就嫌後生仔低B冇見過世面，淨係識做低頭族，哈！ 電影另一精彩之處，就係話畀大家知，賽車唔止比速度比部車精密，仲要比計謀！當然啦，荷里活電影作為美國軟實力嘅輸出，必然會反映現今價值觀。之唔係：美國必然可以重登80、90年代高峰，美國必然最偉大！