蕭正楠曹永廉內地騷唱不完 仲要出埠拍旅遊節目

藝人曹永廉（阿廉）及蕭正楠（阿蕭）感情猶如一對「異父異母親兄弟」，近期孖住於內地穿州過省舉行音樂會，所到之處相當受歡迎。而前晚迎來第4場珠海橫琴站的演出，吸引大批歌迷購票捧場，演出時台下反應熱烈，令兩人愈唱愈興奮，及後相關視頻及照片於網上瘋傳。 事後阿廉受訪表示﹕「我真係好鍾意台下大家嘅反應及氣氛，都係嗰句啦，多謝大家支持我又唔嫌棄佢，哈哈﹗不過今次我哋編排咗啲新歌加入歌單裏面，都花多咗少少時間去排舞。（開騷愈唱愈有？）都要睇吓傾唔傾得成，同埋有適合嘅場地囉，嚟緊我哋應該9、10月有汕尾及連州站演出，當然梗係愈多愈好，大家都多啲工作機會。」 阿廉今次更帶同太太及一雙子女到訪珠海橫琴，順道放了個短假﹕「同屋企人去食吓嘢、放鬆吓，到阿蕭抵埗喇佢又加入，開騷前我同佢坐低傾偈，大家都好enjoy。」他坦言兩人建立的默契非一朝一夕而成﹕「嚟緊我同佢仲會被公司安排，出埠拍一個旅遊節目，到時仲會有黎耀祥同行，應該都幾好玩，我哋真係當正自己去旅行㗎，開心吓囉。」