娛圈單打︱毒蟲影帝唔使坐 演藝生涯玩完未

南韓青龍影帝劉亞仁濫藥吸毒案，二審判決後，由原本坐花廳一年，變成緩刑兩年，控方梗係唔忿氣啦，早前提出終極上訴。結果日前出爐，最高法院駁回所有上訴，換言之，唔使踎監，執番身彩。之但係演藝生涯有冇得延續落去，全世界都唔多睇好。 劉亞仁被指2020年9月至2022年3月，以進行醫美手術為由，使用俗稱「牛奶針」嘅異丙酚多達181次。2021年5月至2023年8月，條友仔又冒用他人名義，44次非法取得過千粒安眠藥，都咪話唔誇張。仲未完，2023年1月，佢又被控跟一名崔姓男子喺美國隊草、教唆他人吸毒，之後仲協助共犯潛逃及毀滅證據。嘩，衰嘢一匹布咁長，簡直罄竹難書。 之不過，名人有特權，係放諸世界皆準嘅潛規則。佢一審被判監禁一年，罰款200萬韓圜，不准保釋。今年2月二審，法院認為劉亞仁確實患有睡眠障礙與憂鬱症，且已服刑5個月反省，承諾不會再犯，因此維持原判，但緩刑兩年。 總算唔使洗定八月十五啦。刻下粉絲最關心，就係劉亞仁能否東山再起。事實上，佢搞出呢壇嘢期間，依然有幾套之前拍落嘅電影上畫，收穫不少好評，唔少人都覺得，一個天才型演員若就此玩完，未免可惜。 講係咁講啫，吸毒係南韓演藝圈大忌，衰過不倫出軌，好似Big Bang嘅T.O.P吖，佢同個女練習生一齊隊草斷正，不至於重判坐監，但事隔多年，依然未能全面復出，只能喺海外試水溫。劉亞仁仲要被指為同性戀，喺保守嘅大韓民國，似乎更難翻身。