林一峰驚爆離婚避談另一半性別 與二汶兄妹「決裂」

長居外地的「唱作才子」林一峰難得回港宣傳實體大碟，一蒲頭即擲下「震撼彈」，自爆已婚及離婚年半，回復單身後更不乏追求者；談及其負面新聞多多的歌手胞妹林二汶，他竟稱「永不再合作」，今後自各安好，惹來兄妹決裂揣測。 被網民列為「樂壇失蹤人口」之一的林一峰，日前接受專訪大談近況，透露因愛上西班牙的「藍色世界」，去年移居當地鄉間，每年只返港3至4次探訪年邁雙親。問到可有拍拖時，他驚爆：「我結咗婚，仲離埋婚年半啦，依家我唔鍾意人㗎啦，只鍾意狗，當初結婚係因為所有嘢要走到呢一步。（點解離婚？）拜拜，唔講啦，件事都過咗去。（另一半係男定係女？）唔講啦，我真係『淨身出戶』。（依家有冇人追？）我身邊一向都好多人嘅。」 出碟翻唱天王天后經典歌 談及婚姻失敗後可敢再闖情關或再婚？他覺得婚姻並非每個人都「適用」，認為一紙婚書只是解決實際問題的「鑰匙」，他舉例：「一齊報稅可以交少啲錢，或者多咗本護照啦、自己有病時佢幫手簽紙，不過為愛就唔好啦，千祈唔好諗咁多。」又笑言外界以為他逍遙自在，但其實他將所有心思、資金放在製作音樂上後已「一無所有」，所以一口氣推出4張實體碟，翻唱曾為天王、天后包括陳奕迅、孫燕姿、楊千嬅、蕭亞軒等創作的經典歌曲，稍後到柬埔寨開騷，亦望有機會挑戰香港最大型場館啟德主場館。 問到胞妹林二汶亦絕迹香港，而2月時兩兄妹曾在內地聚會疑傾開騷，網民戲言演唱會大可名為「一峰不能藏二汶」，豈料一語成讖，他竟然說：「唔會再做呢件事，或者我寫歌畀佢，如果佢要嘅話，我有好多嘢想做，同埋我同妹妹其實係好唔同嘅人，有時佢去咗邊，我都唔可以問，只可以問媽咪，一年只見3至4次。」問到兄妹感情有變？他又謂不合作不代表感情差，親兄妹亦要隨緣。 有傳妹妹信奉「邪教」，一峰說不看新聞，再問他可有關心胞妹？他謂：「其實Ellen（歌手盧凱彤）去世後帶動咗整件事嘅轉變，呢個係唔可以改變，只可以繼續做自己，大家Move On。」又覺得不應因為「一家人」而要接受家人的一切，更反問：「係咪一家人，所有嘢要硬食先？」他又覺得毋須向妹妹了解，認為每個人有選擇及承擔，作為身邊人只可以「企喺度」。 另外，轉攻內地市場的林二汶在社交網分享遊佛山的南風古灶，介紹當地陶獸文化，參觀500年樹齡的參天巨榕樹時，樹幹卻不及身軀粗壯，網民估計她好食好住關係，噸位才再加碼，亦有人叮囑她要多做運動，年過40歲更要注重健康。 陳奕迅下月巡唱尾站　網民點唱《謝謝儂》 歌手陳奕迅（Eason）與林一峰感情不俗，一峰今次推出的新碟都有翻唱對方的歌曲，識英雄重英雄，互相欣賞。早前Eason於海口舉行巡唱，在當地拍了不少有趣相片及短片，短片中他一口「啪入」生果，並寫道：「未試過一啖食晒成粒荔枝，正！」有網民懷疑他吃的其實是士多啤梨，不過，孰真孰假都好，粉絲們都爭相留言：「我幫你剝殼」、「你比荔枝更甜」等，其中有網民更提到希望Eason下月澳門舉行巡唱尾站時，可以聽到他大唱歌曲《謝謝儂》，該歌曲正是由林一峰作曲，十分經典。 糖妹做Michael Bublé「合夥人」 視林一峰為啟蒙老師及人生導師的歌手糖妹，日前在內地歌唱節目《歌手2025》中擔任曾獲格林美獎的加拿大歌手Michael Bublé「合夥人」，昨日她接受訪問時表示：「我真係未試過有格林美級嘅歌手企喺我面前，會同佢一齊做節目嘅Opening，Michael非常好玩同好搞笑，佢成日話如果去溫哥華可以搵佢。」又謂身邊朋友得知她可跟巨星合作大表羨慕。除忙於錄影《歌》之外，糖妹半年內接拍了按摩椅、多個美容產品、保健品廣告，還有拍劇、演出音樂節目及參與旅遊節目，遊遍西藏、新疆、敦煌、寧夏、內蒙等名勝，她說：「我同熊貓特別有緣，去到邊都見到熊貓。」據知她一口氣賺了7位數字，問可會樓獎勵自己？但她卻說：「我鍾意買金同保險多啲。」 場地：Major Pop Art