現場實況： 張敬軒為Tyson啟德「破處」兩度玩插水 大嗌好正：「嗰邊有人揸籮柚，呢邊有人拍我肚腩」 爆笑指TY搵佢出火 獲贈001黑膠

【Viu】Tyson Yoshi今晚喺啟德體藝館舉行尾場個唱，請嚟張敬軒任嘉賓，兩人合唱《By My Side》！繼林家謙後，軒公亦跟隊成為喺啟德「插水第三人」，佢話入行一直行classy、好elegant路線，但佢大呼：「為咗Tyson Yoshi，今晚喺啟德破處！」Tyson緊張向歌迷講安全守則，「電話收埋！雙手舉高！同埋唔好揸春袋 、揸波！」軒公呢晚相當興奮，玩完一次意猶未盡，再encore嚟多轉：「咁大個仔都未見過有咁多對手喺自己身上！」佢不停話好正好開心，又笑稱有人抽水：「嗰邊有人揸籮柚，呢邊有人拍我肚腩，邊個拍我肚腩呀？」⁠Tyson呢晚送上001黑膠予來賓，軒公感動稱：「呢啲真係有今生冇來世！」又表示會將份禮物擺床頭。⁠Tyson又提到每次有啲嘢諗唔通，喺發脾氣之前會打俾軒公，「之後就會㩒返低團火，就會好啲！」軒公抵死應道：「我嘅功能係涼茶，俾你出火！」隨即更正：「下火！」Tyson嚟緊會去歐洲舉辦山林婚禮，佢喺台上呼籲話：「聽日就飛去結婚，我哋話晒最大邪教組織（暫時性），見其他教成日有送機活動，我都心郁郁，人生得一次，有冇人可以送機結婚？」Tyson公開吹大雞，得到唔少觀眾和應會送機！