港姐2025︱「翻版劉佩玥」陳詠詩文武雙全 為香港藝術體操隊代表

今屆港姐入圍佳麗已公開12位靚女，當中26歲「翻版劉佩玥」陳詠詩（Stacey）憑高挑身形及燦爛笑容成功突圍。除外貌亮眼，佢更擁有紐約名校碩士學歷，現正攻讀博士課程，堪稱文武雙全。土生土長嘅陳詠詩，曾就讀傳統名校瑪利曼中學，自小活潑好動，3歲就已經開始接觸平衡木、跳馬等競技體操項目，7歲時陳詠詩主動向父母提出轉項學藝術體操，並於13歲正式加入香港藝術體操代表隊。 13歲加入體院嘅佢，贏得當年全港藝術體操公開賽全能第一名；2017年曾與其他香港體操隊成員去日本集訓。為了追夢，佢每周訓練超過20小時，甚至於中學最後兩年轉讀有網上教學嘅學校，以騰出更多時間練習。佢曾坦言自己於藝術體操界「不夠高、不夠瘦」，先天條件不如人，只能靠後天努力彌補不足，並於2012至2015年均獲全港藝術體操公開賽個人全能項目第一名，之後她更代表香港參加多個大型國際性比賽，更曾獲中國香港體操總會頒發傑出運動員獎項。 Stacey之後離開香港赴美升學，入讀加州大學柏克萊（University of California, Berkeley），畢業後再升讀哥倫比亞大學（Columbia University）修讀碩士課程。陳詠詩就讀嘅兩間大學均屬百大名校，根據最新2025年QS世界大學排名，加州大學柏克萊分校位列全球第17名，至於哥倫比亞大學位列全球第38名。今年5月佢就分享畢業靚相，曾透露繼續修讀博士課程，趁暑假回港參選港姐。Stacey有學歷、有樣貌，更係面面俱到嘅運動員，一舉成為今屆大熱。