靚媽陪放暑假 陳凱琳倪晨曦泳裝撼方媛徐若瑄靚樣

踏入7月，一眾星二代都一同踏入開心暑假，唔少藝人都為咗小朋友準備唔同活動去「放電」，享受親子樂，更意外造就多位索爆靚媽晒好身材及美顏嘅機會。就好似陳凱琳咁，佢就同幾位小朋友下水禮，去到沙灘大玩特玩，佢仲直言依家已經唔敢再着Bikini，反而換上方便湊小朋友要一件頭，不過晒出事業線頭就唔可以少，佢仲配上白色短裙仔一同落水，時裝同泳裝完美結合。 同樣生咗3個小朋友嘅倪晨曦亦不遑多讓，佢帶3個小朋友出國飛越南玩，愛感受生活嘅佢就陪小朋友學整當地嘢食，又到果園玩採摘，更跑到private pool一展好身材。Model出身嘅佢，大晒曲線有前有後，更大方以三點式上陣，成個Trip勞逸結合勁有愛。 至於台灣女神徐若瑄，佢就陪仔仔喺新加坡玩，早前晒出特大帽子嘅佢，今次就同阿仔去到動物園見識，去到亞洲最新兼首個「探險動物園」，一拖5咁湊埋親友嘅小朋友，搞到佢都要拖埋車仔去拎隨行物品，不過佢靚樣取勝，唔講仲以為佢係眾小朋友嘅家姐。 方媛就更加係美顏孕媽代表，湊住兩個女之餘，仲可以悉心打扮一番，以多套又靚又貴氣嘅靚衫示人，得體又有青春，唔同嘅連身裙上陣，雖然未見肚凸凸，但佢都以外套綁腰遮孕味，完全睇唔出佢依家係佗緊BB。