娛圈單打︱爺孫戀冇晒下文 出獄後即玩失蹤

「你這剎那在何方？我有說話未曾講！」喂呀，呢句經典歌詞，會唔會就係基哥李龍基此刻心聲呀？自從未婚妻王青霞上月初放監、基哥手持60支玫瑰、山長水遠去到深圳灣口岸迎接之後，青霞妹就冇再喺公眾面前出現。當時揚言見完家長就會完婚嘅基哥，更被人發現一支公落寞地遠赴加拿大登台。 網上傳聞愈演愈烈，話青霞妹出獄後隨即回鄉玩失蹤，同基哥完全斷聯，有好事之徒甚至喺網上幫基哥製作「尋妻啟事」。癡心情長劍遇上滅絕師太，怕且都係咁先咯。唔係潑冷水呀，諗都諗得到，經歷咁多嘢，除非真係有大舊錢揸手啫，否則做乜仲要服侍爺爺喎，不如隱姓埋名重新嚟過，話晒37歲仲算後生啫。 雖然若要人不知，唔好咁低B，但之所以監都有得坐，冇人篤灰肯定不可能成事。咁究竟邊個係金手指，可以如此熟悉內情，將條女一鑊翹起呀？左諗右諗，除咗身邊最親密嘅人，都諗唔到第二個咯。本欄早前都寫過，薑係老的辣，趷起條尾知你想點，「孫女」又點飛得出「爺爺」嘅手指罅吖？可惜人算不如天算囉。 有人若然唔再眷戀舊時生活，甘於平淡是福；又或者認為仲可以東山再起，另搵老闆，咁真係冇必要對住個老人家日日玩攻心計。唉，千算萬算，基哥今鋪算唔算失算呀？ 不過唔緊要啦，睇吓基哥又可以飛到咁遠登台掘金，就知佢老哥真係長搵長有。話唔定有人鳥倦知還，失蹤完一輪，還是覺得爺爺你最好呢？最緊要唔好學似「何伯何太」咁肉酸，見血收場，仲要對簿公堂。係咪咁講先？