娛圈單打︱音樂才子好風流 溝女把口𠺘過油

《中年好聲音》唔止一班中1、2、3生感情轇轕澩咁嫪，就連評審老師一樣咁精彩。呢，54歲嘅音樂人張佳添，早前先至口花花話自己係冇腳雀仔，仲傳出力追「TVB女神」、高層樂易玲小姐添！口痕友暗嘆，添Sir你咁識撩女，連一把年紀嘅樂小姐都吼，抵你長做長有。 好啦，正當花生友準備食花生之際，原來冇腳雀仔力追樂小姐只係煙幕，新歡係黃宗澤舊愛、44歲嘅甄采浠至真！前名甄詠珊，係前女子組合Freeze成員，出過碟、拍過戲，同張佳添應該有大把話題，唔怪之得一拍即合啦。 二人被目睹攬到實一實逛商場，好似連體嬰咁款，仲一杯咖啡兩份飲，非常煙韌。早在今年3月，張佳添推出新歌，已搵嚟女友擔任監製，擺明一早有路。有傳兩人之所以撻着，跟張佳添前妻、填詞人黃敬佩有關，皆因兩女同為Labubu粉絲，又有共同朋友，經常約會見面，最終由閨蜜前夫變成自己男友。嘩，都好錯綜複雜啫，惟有嘆句緣分真奇妙。 自古才子皆風流，添Sir亦唔例外。佢曾有兩段婚姻，兩個前妻先後為佢誕下兩個女兒。離婚後感情生活繼續多姿多采，兩年前曾被拍下跟長髮索女街頭激咀。家陣跟甄采浠撻着，似乎好認真喎，祝福佢哋開花結果啦。 話時話，事前都冇乜人估到，《中年好聲音》會爆到七彩，得獎者固然撈得有聲有色，評審老師一樣風生水起。TVB打造咗呢隻會生金蛋嘅鵝，邊個可以加入成為評審，邊個就可以人氣急升，個個𥄫到實，為保飯碗，梗係要賣吓口乖、擦吓高層鞋啦。