譚耀文入行37年首開個唱 數十位歌迷撐埸

《譚耀文 In Full CHARACTER》演唱會將於12月2日在麥花臣場館隆重舉行，日前在記者會上，譚耀文（阿譚）和主辦單位及贊助商，還有阿譚在「聲秀」的學員胡港豐、布子殷與蕭凱恩，以及他的數十位歌迷也有親臨現場支持。 阿譚在記者會上表示：「全靠大家支持，我先可可以舉行入行37年首個個唱，整件事真係好夢幻，今日未行上台之前，感覺好像好陌生，但喺台上聽到大家嘅叫聲和歡呼聲，睇到粉絲嘅支持，以及主辦單位、朋友好多好多嘅愛，回憶即刻返晒嚟，感覺這麼遠又那麽近，真係好感恩。」 阿譚在記者會上唱了兩首歌，他指個唱歌單構思了多年，有影視、出道時的作品，也有懷念部分及向巨星致敬的環節，歌List豐富，又謂：「有啲歌我一定會唱，有啲仲係歌迷留言喺我社交平台上希望我能現場演譯，因為當中部份曲目我以前仲未喺台上表演過，覺得呢啲歌好有意思，今次全部拎出嚟，配合時空、劇情，以及我喺演戲上嘅歷練，將我多年嚟歌手同演員嘅身分結合喺一齊做一個總結，希望嚟睇我演出嘅樂迷會感到驚喜，依家我每個都有練歌，過幾日就開始緊密排練，真係非常期待。」 在記者會上主辧為阿譚送上驚喜，好友陳淑芬、郭富城、佘詩曼、張智霖、陳偉霆、梁詠琪、伍詠薇、陳煒、湯寶如、林家熙 （Locker）、姚樂怡、鄭浩南、林熹瞳、何佩瑜、與及張繼聰和張振朗等也拍片為他打氣，阿譚在看片段時感動得一度眼紅紅，手執紙巾說：「我其實個人好man ，但睇到咁多好朋友拍片支持送驚喜，真係無乜人會頂得住，哈哈！」 另外，「聲秀」三位學員胡港豐、蕭凱恩、布子殷送上蜂蜜禮盒，讓他隨時可以滋潤喉嚨，作為導師的阿譚將會帶同學員在演唱會上齊演出。贊助方送上年份為1988年的紅酒，這也是阿譚獲取新秀歌唱大賽冠軍的年份，主辦單位天星娛樂陳淑芬陳太送上有意義的禮物，陳太說：「我同阿譚結縁於風雲音樂劇，在劇中阿譚飾演世外高人無名，我特別把佢喺劇中所穿戴嘅手腕護甲送畀他，去年我喺澳門舉辦50周年紀念展，都展覽過護甲。」