周杰倫自爆曾恐慌發作無法上台 轉頭宣布下年開新巡唱

台灣天王周杰倫歷時6年嘅「嘉年華」世界巡迴演唱會，前日（11日）在上海完美落幕，共舉辦了110場，上海3場累計超過18萬4千人，成該場館單場與總人數最多紀錄。不過佢就自爆原來曾一度恐慌發作無法上台！不過佢所屬嘅杰威爾音樂尋日（12日）就宣布，全新巡迴演唱會將於明年展開。 目前正籌備新專輯嘅周杰倫，其「嘉年華」巡演2019年自上海起跑，此次重返上海，佢大唱超過40首經典作品，唱完最後一首歌《七里香》後走落舞台，喺在場6萬名歌迷狂嗌Encore後，大屏幕播出佢準備離場嘅車輛，不料男神突然轉身走回現場，唱起安可曲作為最終場嘅特別彩蛋。佢尋日（12日）亦於社群吐露心聲，表示曾發生恐慌發作、無法上台、聲音狀態唔好等狀況，但想到歌迷可能期待咗幾年，佢就硬撐住上台，同時戴頭盔指下次新巡迴可能已經唱唔到原Key：「我能不能每場唱原key我不知道，但我知道，不管原不原key，我還是會回到舞台，跟你們繼續創造回憶。」 杰威爾音樂同時宣布2026年啟動新主題巡演，每座城市將擁有專屬演唱會名稱，結合當地文化設計特色環節，當中杭州4月開唱成首站，另外網傳仲有鄭州、北京鳥巢。為保障周杰倫健康，團隊縮減單城場次，由4場變為3場，又會加入AR科技降低強度，全新舞美升級及T型延伸舞台。被問到明年台北是否會有新的巡演？杰威爾表示：「新的演唱會時間、名稱等等，我們會再公告。有確定的場次也會再陸續公告。」