《女神》富二代閃婚新娘唔係關嘉敏 羅毓儀嬲爆質問

無綫真人騷《女神配對計劃》成功撮合多位圈中女神，當中葉蒨文（Sophie）同羅毓儀（Yuki）分別與曾展望（GM）及林俊其（Kris）配對成功，公開放閃CP值滿分，更帶挈眾人代言、商演做到冇停手。當中另一備受關注嘅女神關嘉敏（Carman）最後保持單身，拒愛富二代黃家俊（Matthew），不過好在節目後仍保持「了解中」狀態，仍然有機會脫單。點知一轉頭，前日（11日）Matthew無預警下晒出一輯婚紗相，女主角竟然唔係關嘉敏，令人非常意外。 節目入面對關嘉敏展開猛烈攻勢嘅佢，本身已獲關爸爸邀請中秋節上門食飯，雖然最後關嘉敏因開工而未能成事，但外父政策已見成效。如今佢晒出「閃婚照」，關嘉敏好友羅毓儀都睇唔過眼，火速派嬲留言質問：「下！點解唔係carman？」原來Matthew輯婚紗相只係模特兒工作，佢都親自留言解釋目前仲係單身，又表示：「冇人搵我同Carman😅」睇嚟襄王仍然有心，係唔知神女有冇夢呢！