林奕匡領軍沙灘騷 鍾柔美Hot爆唱到剝衫

歌手林奕匡（Phil）日前率領張馳豪、鍾柔美、應智越、林芊瑩、Nowhere Boys、Locksmiths（開鎖佬）、Cozy Syndrome、The Lemon Ones及IdG Bubbles輪番在「屯門沙灘節2025」獻唱，音樂節奏炒熱全場，掀起沙灘狂熱！ Phil開心透露今年度過個特別的中秋，因囝囝過首個識行識走的中秋，一家三口到郊外慶祝，他說：「囝囝好鍾意沙灘，本來想帶同囝囝嚟，但擔心音響太大聲，好希望有一日佢睇到我表演，佢好鍾意音樂，期待囝囝快啲長大，可以一齊合唱。」 鍾柔美首次現場演唱新歌《不欠你一個朋友》，演出前她在後台一直培養情緒，而在台上深情演唱完《不》歌後，接着又唱又跳兩首快歌《跳舞街》、《Monica》跳到除外套，台下粉絲即嘩然大叫。演唱完後，她表示第一次公開演唱《不》這類慢歌，心情緊張的她說：「希望大家睇到我慢慢進步。」 張馳豪第一次做沙灘騷，大叫好玩：「初時驚好熱，但現場氣氛好好。我好怕熱，如果有機會開演唱會，最好喺雪地舉行。（會唔會到沙灘拍拖？）唔會，沙灘拍拖多沙又熱又黐立立，拍拖露營比較好，遲啲真係會有首露營歌，好甜蜜的新歌。」 樂隊Nowhere Boys及Locksmiths（開鎖佬）分別以過來人身份參加今次比賽的得獎樂隊分享心得，Nowhere Boys表示今年出道第10年，已經第5年參與演出，所以特別有感情，寄語得獎的新Band做音樂要預了捱窮，無論幾窮都一定要出歌，千祈不要把音樂當作收入來源，及不要諗會爆紅，一定要堅持理想。又笑言雖然出道已10年，但仍然在捱窮，並透露10月將推出紀念10周年的新歌及希望有機會舉行記者會。 Locksmiths開鎖佬在3年前參加屯門沙灘節「全港青年人Band Show比賽」贏得冠軍，開心說：「我哋喺呢個舞台表演咗第3年喇，見到又有新樂隊誕生，感覺好特別，希望佢哋以後，好好享受舞台，諗到想做歌就要做，同埋做樂隊唔好怕有拗撬，我哋三年以來就合作好開心。」 應智越表示第一次做沙灘騷，笑言終於衝出第一次，透露最近開騷操肌，笑言：「見到其他男藝人除衫好有型，不過依家肌肉量多咗，靈活度冇以前咁高。」談到譚耀文開演唱會，他開心謂有關注，並讚前輩拍攝電影《拼命三郎》時，好似爸爸般很照顧大家，更大讚阿譚歌聲：「謝票時有聽過阿譚唱歌，已聽出耳油。」