曾樂彤喪摸讚浪漫 徐浩冧妻展「熊」風

獨立歌手曾樂彤和MIRROR音樂監製徐浩在「最強卡士」的婚禮上，當着半百歌手面前咀嘴晒愛，徐浩更重拾老本行在台上表演跳唱冧妻，又扮人偶炮製驚喜，雖然辛苦到抖大氣，但有嬌妻呵番，百分百值得！ 曾樂彤和徐浩前晚筵開20多席辦婚宴，網民笑指來賓卡士「比頒獎禮更強勁」，到賀的英皇代表包括蔡卓妍（阿Sa）、關智斌（Kenny）、李幸倪、泳兒、衛詩雅夫婦，還有MIRROR其中9位成員。戴祖儀做姊妹團其大一員，農夫成員C君則任司儀，各人打破不同唱片公司的局限，喪玩3小時。當中曾屬英皇旗下的曾樂彤，跟前公司的歌手及唱片公司人員關係友好，影大合照時最人多勢眾，而魏浚笙偕女友和一對新人影相時，台下賓客即群起催婚！ 周柏豪教路：出力造人 全晚有兩大高潮位，先徐浩重拾組合V成員的歌手身份，在台上跳唱韓國天王G-Dragon的《Home Sweet Home》，見阿Sa走近Anson Lo及Edan的座位，齊齊為徐浩做應援。另一感動位是徐浩扮成巨熊玩偶「DuDu」緩緩行入會場，曾樂彤見到即撲上前攬實狂摸，大呼：「好得意呀！你好浪漫呀！」徐浩除掉頭套後辛苦得索晒氣，新娘子大表心痛：「好慘呀你，熱到咁樣！」徐浩表示此舉只為氹她開心，但在人偶內要彎腰前行，聽不見又看不清，隨即發表愛的宣言：「就好似我哋第時老咗咁！」曾樂彤聞言即時送抱，徐浩笑說：「啲人話搵錢好辛苦，其實娶老婆係辛苦好多。」 專誠到賀的模範夫婦張繼聰和謝安琪合照時嘟嘴放閃，而陳柏宇及周柏豪被問到可有傳授生B秘方，柏豪搞笑表示：「我當年都係上網搵，Keywords係畀力，最緊要有Mood就一擊即中。」柏宇亦分享心得：「早早哋試啦，冇Right timing呢樣嘢。」另外，Kenny散席後在酒店門外發生小插曲，遭粉絲粗暴扯衫要求留步，嚇到他狂呼：「喂喂喂，嘩！」但未有動怒，反而面帶微笑上車離開，而網民大鬧扯衫的行為欠尊重。