吳雨霏爆老公40歲想操返大隻 暫未有復出大計

歌手吳雨霏（Kary）與老公洪立熙（Brian）昨晚（14日）拍拖入場觀賞網球賽事。Kary受訪時，透露受熱愛網球的父親薰陶，自小便愛上網球運動，談到老公為前香港網球代表球員，Kary表示跟老公正是在網球場上相識，繼而譜出「網」上情緣，她説：「當時13、14歲，朋友去網球賽做球僮，我跟埋去趁熱鬧，就識咗佢。」她又笑言難得可以撇下3名子女跟老公拍拖看比賽。 問到老公看球賽有否技癢？她指老公忙工作已沒有打比賽，但一直仍有保持做運動，她説：「今年啱啱40歲，佢突然話想Keep Fit。（擔心中年危機？）我唔知呀，突然話想40歲變返好Fit、大隻，要練返幾嚿朱古力。（你呢？）見佢咁有毅力，我都同佢一齊操，打波做Gym都有，不過我冇朱古力。（同老公打波邊個贏？）我點贏佢呀？我成日問佢可唔可以將個波打喺我前面，我話我跑唔郁，佢話咁樣唔係叫打波，哈哈！」問到有否覺得老公更有男人味？她直言覺得老公愈來愈吸引，問她是否也要努力提升女人味？她笑謂：「我不嬲都唔係懶嘅，我都生咗3件都算係咁啦，哈哈！最緊要健康。」 談到不時有聲音希望她復出，問到有否復出大計？Kary表示會跟隨自己節奏，因始終要照顧小朋友，她說：「復出計劃？我仲計緊，要喺家庭同事業之間取得平衡。」她指3個小朋友年紀尚少，對她的歌手身份未有概念，也未有給他們聽自己的歌，不過似乎有得到她的遺傳，平日也有點表演欲。