金式森林︱郭晉安陳曉華遇「奪命車禍」 幕後花絮曝光

「視帝」郭晉安與陳曉華在無綫台慶劇《金式森林》中經歷一場「奪命車禍」，兩人在車內接近360度旋轉，車禍畫面相當震撼。車禍拍攝花絮中，原來劇組不但要將車子整架吊起，更將車子作「串燒式翻滾」，曉華與安仔在翻滾中的車廂中演戲，難度相當高。 為達到最佳拍攝效果及確保拍攝安全，劇組預先為安仔和曉華準備好護甲，埋位前更與安仔進行了「摔角色綵排」，兩人還要刻意拉筋熱身，曉華大晒身體柔軟度，輕易將長腿拉過頭。其實平日有做瑜伽和空中瑜伽外，她還習跆拳道，故不時在社交網晒「擘腿神功」，功架十足。 拍攝車禍戲時，雖然曉華做足準備，但由於整部車旋轉衝力不少，拍完第二Take已經頭髮亂作一團，驚現「失魂」樣，相當搞笑。安仔則明顯拍到身水身汗，並笑言拍到想嘔。網民則對當時年屆60歲的安仔親身上陣拍攝動作場面，大感佩服，大讚他有心又有力。 貴為3屆視帝的安仔，對於演戲的確有心，早前就在社交網分享演戲心得，笑言演戲最重要秘訣是「迷失自己」，他說：「我會覺得有啲人對演戲係特別有天分嘅，佢裏面有一個機制，好快就會識得點樣去令到自己迷失，然後去容納咗個角色喺個腦入面。如果你唔能夠迷失自己嘅話，你永遠都會覺得好尷尬，點解我要做埋啲咁嘅嘢？」 安仔對劇集《忠奸人》的角色特別印象深刻：「佢最難嘅地方喺邊度呢，佢有好多限制，限制咗佢要做一個好人，全世界都覺得佢係一個超好嘅人，但係佢裏面有好多嘅諗法，佢每做一件事都係有機心。每次我演嘅時候，都要不停去做一啲違背我意願嘅嘢，但係本身我自己都產生一個分析能力，去主導我自己點樣去演，然後我就將我所體會到人生嘅嘢，擺返喺個角色入面。」