何沛珈做直播主持預了出錯 何泳芍有信心能勝任

「第十五屆全國運動會」將於11月9日在廣州正式揭幕，賽事由9日至26在廣東、香港和澳門三地舉行，今日在電視城舉行記者會，多位節目主持出席，包括鍾志光（鍾Sir)、朱凱婷、鄭衍峰、洪松蔭和何振然等，何沛珈（Roxanne）和何泳芍（Honey)是繼奧運後再次合作，二人未曾支持過全運會，覺得今次比奧運更難，會做定功課。 Roxanne對於現場直播賽事不太擔心，因為有好多前輩在場，預了會出錯，覺得有錯才是直播，會學定幾句執生技巧。Honey就搞笑袋住兩句求生句子，就是「交畀鍾Sir講」、「唔佔用咁多Air Time，睇運動員表現先。」全場爆笑，Honey表示主持過奧運，對突如其來的變化有經驗，相信今次在應變上會比上一次淡定，Roxanne表示若需要求救，一個眼神望向前輩便會收到，所以不擔心。Honey不想太着重於資料性，希望做到代觀眾發問。雖然之前主持奧運要捱通宵，但開心有消夜食，又透露鍾Sir會供應湯水和珍珠奶茶，自己都會帶定小食給大家分享。 鍾志光台上讚現年61歲的「殿堂級車神」洪松蔭保養得宜，搞笑用「無老」形容他，他們曾經多次合作主持體育賽事，默契盡現，洪松蔭對今次主持全運會感覺好特別，知道有份主持開心到彈起，喜歡直播形式，看賽事便原汁原味，觀眾可大飽眼福。鍾志光稱內地有好多臥虎藏龍運動高手，水平絕對勁過奧運，由於不少年輕運動員，網上資料未必好多，主持時更添難度，惟有邊做邊學，但笑言主持全運會最開心是不用捱夜。洪松蔭表示全運會在奧運後一年舉行，選出的精英，再經過亞運會鍛煉，便可以迎戰下一屆奧運。