古巨基打風照Busking 歌迷現場淋雨都要撐

歌手古巨基（基仔）早前在西九海濱長廊作街頭表演，當日撞正一號風球，時而狂風時而暴曬，而近日他移師到尖沙咀演出，雖然天氣同樣不似預期，幸無阻觀眾熱情，他昨日（15日）在社交網上載當日照片，透露原定7月第一次演出定在尖沙咀對住五支旗杆的位置，不過當日因打風而取消，今次特登返到尖沙咀同一位置舉行：「仲特登將今次個theme定為『勵志歌』，不過都係遇上好唔穩定嘅天氣，落下雨又停下，有時細又有時大雨。不過，雨水可以淋濕我哋個人，但係淋唔濕我哋要唱歌嘅心，更加多謝喺現場淋住雨舉住遮點都要聽我哋唱歌嘅各位觀眾！」基仔笑言同時要多謝個天，因為如果太大雨，就算人頂得住，但音響器材都頂不到。 而今次基仔更聯同來自各行各業的人一齊作街頭演出，當中有教師、會計師、歌唱老師、零售銷售員、工商學士、心理學學士等，大讚他們雖然有正職，但仍然堅持玩音樂，值得大家支持及關注。