193做嘉賓獻唱 Delta T：佢每次都喺走音邊緣

全能音樂人Delta T昨晚（16日）假西九開啟首個個人騷，並邀來藝人楊安妮（WinWin）及ERROR成員郭嘉駿（193）擔任嘉賓。Delta T在演唱多首歌曲後，與上台的WinWin合唱了歌曲《9shake》及《Chit Chat》，WinWin分享兩人原是網友，又指自己出道前曾用Delta T歌曲《通心粉》去排舞出騷，然後把片段分享上社交平台標籤Delta T，笑言結果只獲他簡單的讚好回應，傾談過後WinWin獨自演唱歌曲《Throw Away》，與觀眾盡情互動後落台。 隨後Delta T與下一位嘉賓193合唱《東涌日和》、《Chit Chat》、《再次Puppy Love》及《I Just Wanna Dance》，在演唱完《東涌日和》時，193分享指這首歌是自己細個時聽：「嗰陣係冇錢搭車去東涌，睇完個MV冇錢去扮，即係細個睇完MV就好想做MV男主角，我細細個就幻想自己係主角」，獲Delta T搞笑回應：「我冇咁諗過，我細細個就係主角」，又指選擇這首歌是因為想自肥，加上亦是新歌《純愛夜空》的靈感來源：「純愛夜空微風的聲音當情歌，唔係坐跑車啦」，193聽「跑車」一字即藉機抽自己水：「咩跑車啊，唔好提呢個字。」193又指Delta T經常到Disco打碟，笑言打碟是他的正職，唱歌是蝕錢的副業，Delta T聞言即反駁：「邊度係，賺錢㗎，今日賺到好多添」，193便笑言只是今日，不過亦借機幫忙宣傳Delta T剛推出的專輯和周邊。 Delta T完騷後接受訪問，他感慨入行5年後終於實行出碟及出騷，雖然忙碌但相當開心充實，又指由75kg減到65kg，笑言所以認為自己靚仔咗，更透露家人尤其太太亦有到場支持。問到《東涌日和》相當高音，令193唱到在走音邊緣，Delta T就指：「其實193每次都係走音邊緣，邊緣啫，但係佢都無走到，佢每次都要比啲驚喜加驚險大家，但永遠都無事，化險為夷，呢個就係佢最勁嘅地方，所以我就最鍾意同佢合作」，又指今次是自己主動邀請193，旨在令他這種去開大場地的大明星，感受下他們較小的場地，與觀眾近距離接觸。 提到193在台上表示出碟蝕錢，Delta T就指在這個年代，出碟不是為了賺錢，而是「自肥」，所以賺定蝕不重要，最重要是開心，當是買個體驗，而問到自資出歌的金額，他就表示自己做幕後慳了很多，不算超級貴，能力範圍內做到就可以，又指之後會朝著啟德場館為目標去努力，笑言希望有一日紅過193。至於問到今次為何不邀請保琦做嘉賓，Delta T解釋道：「同budget有關，搞騷開心但都要圍返條數，下個騷就請佢㗎啦，請佢再請埋肥仔個啲」，更笑言要他們表演自己不擅長的：「肥仔去健身，193去跳舞。」