羅毓儀林俊其《女神配對》變真情侶 突宣布成為「夫妻」

在無綫《女神配對計劃》中配對成功的羅毓儀和林俊其（Kris），節目完後成為真情侶，經常糖黐豆，高調拍拖、高調工作，除一齊拍廣告外，又合體拍節目，他們的新節目《好嘢港多啲》於昨晚（18日）播出，羅毓儀在社交平台宣布他們升呢做了「夫妻」，她寫着：「出街啦！今次我同Kris竟然飾演兩公婆！個角色名仲要係蔓蔓！《下流上車族》嘅蔓蔓都大個女了，時間過得真係好快。」2022年，羅毓儀在劇集《下流上車族》中飾演車蔓蔓一角，受到觀眾喜愛，成功入屋，今次在新節目中，「蔓蔓」更加成熟，認真大個女了。