林德信時隔13年再出專輯 盼與父親林子祥開騷

歌手林德信（Alex）今日（22號）出席飾品品牌活動，他將於明年推出收錄6首新歌的實體碟，而首炮歌曲名為《情歌還是老的好》，對於相隔13年再出新專輯，他就話一直想實踐音樂企劃，因不想身為歌手僅在出道推出過1張唱片，而唱片封面亦構思好，他說：「爸爸（林子祥，阿Lam）39幾、40歲時推出《最愛》嗰張唱片嘅封面相，就係抱住1歲大嘅我影嘅，依家我有1歲大嘅女，同埋我依家都係40歲，所以想好似當年咁抱個女影番次唱片封面相，想做番個承傳。（不如叫阿Lam抱住你再影番次？）唔得啦，我太高大，佢抱唔到，不過囡囡影相就冇我當年咁定。」 之前曾在內地開演唱會的他，可考慮父子檔開騷？他就話一直有此心願，不過阿Lam和太太葉蒨文正準備展開巡唱，所以要等他們巡唱完才可實行，他自信謂：「我ok架，爸爸都ok，但我未問佢，我諗佢冇問題嘅，（阿Lam同葉蒨文巡唱可能要幾年時間喎？）我等得嘅，不過如果要成家人，叫埋妹妹一齊開騷就難啲，因為佢要照顧3個小朋友，又喺加拿大定居。」又謂因為要推出唱片，所以要努力工作搵錢做資金，笑言現時好窮。 同場的湯鎮業之子湯君耀上月推出新歌《Friendship Only》，身為今年樂壇新人的他揚言不恨獎，所以沒有報名參加頒獎禮角逐獎項，他說：「唔覺得可惜，我都係鍾意唱歌。」他表示已將新歌給爸爸聽並獲得正評，雖然和堂姐湯洛雯一年只見一次，笑言會找堂姐及堂姐夫馬國明幫手為新歌宣傳。問到可有收看爸爸在新劇《巨塔之后》的演出，他就話和爸爸一樣愛看電影，他說：「一日可以睇三套戲，依家爸爸有樂悠咭，會睇早場，佢好慳儉。」