羅子溢擊敗劍橋學霸施宇琪 接受「四方帽」加冕

由林盛斌（Bob）、應屆港姐亞軍施宇琪及季軍袁文靜主持的全新台慶綜藝節目《攻你上大學》今日（23日）舉行記者會，無綫熱播劇《金式森林》一班演員包括羅子溢、羅天宇及陳星妤等亦有齊齊出席，眾人大玩學術問答遊戲，最終羅子溢更成功擊敗劍橋學霸思宇琪，接受「四方帽」加冕，他笑言：「大家唔好對我咁大期望！」 子溢受訪時笑稱雖然沒有讀過大學，但平日喜歡上網看歷史、天文地理和音樂吸收知識，今次全靠社會經驗勝出，又自爆當年中學選錯科：「本身想報文科，但人人都話理科好出路，所以依家都會同小朋友講揀返自己鍾意嘅科目。」他指小朋友年紀小，還未懂得什麼是大學，對成績未有概念，但坦言女兒的一句說話令他很在意：「佢會問『係咪爸爸媽媽好想我贏到呢個獎項呀？』我聽完唔係好舒服有啲心傷，驚佢覺得爸爸媽媽嘅愛係出自於成績，其實個觀念係錯嘛，證明我要改進、改善一下。」他表示會向小朋友灌輸盡了力便可的觀念，享受學生生涯便可。 子溢透露大女下年將升讀小學，現時自己在家主力教小朋友中文，太太楊茜堯則負責綜合科目，亦有請導師以活動教學方式，玩遊戲學英語和普通話，他指小朋友都是就讀國際學校，仔仔的廣東話有待改善：「黎諾懿都叫我唔使擔心佢哋英文唔好，擔心佢廣東話唔標準好過，原來真係！」子溢表示雖然太太現時忙於內地拍劇，但每星期會預早安排好小朋友行程，感謝太太用心。另談到家中愛犬早前離世，令太太傷心不已，問到會否再養？他坦言跟太太有不同看法：「太太就唔想再接受住，但我就希望畀小朋友學習照顧同責任心，我都明太太驚再接受離去，所以我會等個女有照顧人嘅能力先再養小動物。」 主持Bob被問到拍攝節目期間有否被嘉賓的答題「激到嘔血」？他笑指也有，但亦幸好有一班嘉賓的搞笑答案，令漫長的拍攝過程變得有趣。問到對兩位新晉主持表現？Bob大讚施宇琪能運用學識跟嘉賓及觀眾解釋答案，令大家易於明白，亦知道對方有上配音班進修説話技巧，至於袁文靜則令他想起前港姐李綺虹，他説：「廣東話唔係好叻但好可愛，就算講嘢撞板大家都會覺得好好笑，令氣氛好好，知佢都努力學緊廣東話。」談到袁文靜早為答謝Bob在節目中照顧，於社交網發文感謝對方，但卻誤將包「涵」寫成包「含」，引發大家無限想像，袁文靜尷尬解釋：「因為我用語音翻譯文字，因為普通話涵同含一樣嘛，下次我會打字。」Bob則補充説：「我之後Cap圖出嚟諗住搞下笑，佢即刻問我要唔要刪除咗佢？我話唔使，幾好笑吖。」問到施宇琪會否因自己劍橋生身份，令拍攝時有著數？她坦言知識學習並不一定跟就讀學府有正面關係：「知識可以靠自己睇書同社會經驗累積，不過我本身好學先入到劍橋。」又表示節目中對嘉賓馬國明印象最深刻，因自己自小已看對方的演出。 另談到Bob大女早前被網民遭受網民性騷擾一事，他讚女兒雖然只得17歲，但面對批評或攻擊時沒有選擇逃避，並以大方、正面及自信的方式去回應，自己也收到不少網友訊息讚女女，一家人吃飯時弟妹也大讚家姐很叻。