林峯世巡攻佔歐亞美3大洲 加國站隨時再同鍾嘉欣合體

歌手林峯《Go With The Flow》世界巡迴演唱會氣勢如虹，完成了佛山及廣州兩站後，未來兩個月林峯將出發歐、亞、美三大洲繼續唱，分別是上海、馬來西亞、拉斯維加斯、大西洋城、雷諾、溫哥華、多倫多、倫敦及東京等多個城市。 上海站於11月1日舉行，他表示最開心是囡囡，因女兒很想來看他演唱會，但因為要返學，今次在上海舉行便不用請假，指女兒知道後很開心。之後緊接其後的馬來西亞場，林峯表示：「我諗住帶宣萱嚟一齊食馬拉肉骨茶，大家開心嗎？哈哈！」而加拿大溫哥華及多倫多的場次，林峯透露：「鍾嘉欣媽咪一早打電話嚟訂飛，話要帶晒全家嚟捧場，真係好多謝Auntie咁支持！（嘉欣會唔會上台做嘉賓？）佢話暫時未知時間夾唔夾到，不如大家幫手喺網上呼籲佢做特別嘉賓啦！哈哈。」 12月8日生日的他，表示今年生日在開騷中渡過，他笑言：「今次係首度於倫敦渡過生日，演出就係12月9日。」據知歌迷萬般興奮，準備為他籌備生日驚喜，林峯笑言能舉辦到世界巡迴演唱會已是最好的生日禮物：「從來冇諗過生日喺倫敦呀！都真係幾開心，今年可以喺世界不同角落與大家分享音樂，已經係我最珍貴嘅生日禮物啦！」當知道歌迷準備為他生日場大事慶祝，林峯笑謂：「如果佢哋咁諗我都好歡迎！不過今次要同fans講聲，千祈唔好買太多蛋糕嚟，我要保持身材，否則後面演唱會啲歌衫全部穿唔落就大件事！難得喺海外過生日，希望同大家一齊盡興慶祝，我知道大家會好開心，但都要幫手監督我唔好食太多甜食呀！」 今次巡演的倫敦與日本兩站均是他首次踏足，回憶起TVB年代曾經同吳卓羲去日本參加過音樂祭：「當時合唱《Monica》等經典歌，今次收到好多日本歌迷留言話想再聽呢啲歌曲。」對於歌迷呼聲，林峯爽快答應：「絕對可以！其實成個巡演，我哋特意設計點歌環節，大家隨時透過社交媒體留言，除咗《Monica》，仲可以點唱其他歌，希望盡量滿足所有歌迷想聽嘅歌！」 另外，林峯同時預告全新單曲即將面世，透露剛錄好新歌，下星期便會在港首播，今次作品也是由黃偉文操刀，探討比較深刻的愛情觀為題材，他並許下心願希望新歌能傳遍各地：「由上海，吉隆坡到拉斯維加斯、倫敦到東京，所有巡演城市都有機會聽到呢首新作！」