高海寧連身裙騷Fit爆身材 分享保持容光煥發秘訣

藝人高海寧（高Ling）日前出席活動，早前放完1個月假連到3地旅行的她心情大靚，以貼身連身裙現身，盡顯Fit爆身材。正為新劇《飛常日誌II》開工的她，分享保持容光煥發的秘訣就是去旅行，但現在正是事業搏殺期，這個方法實在非常奢侈：「依家最缺就係時間，咁啱個劇延遲咗開工，公司好好見到有個空檔，就畀我放個假放鬆吓，始終之前工作壓力比較大，於是我就去咗滑雪，又去峇里島做瑜伽，再去咗轉法國南部。」 她的南法之旅更是她首度獨自旅遊：「冇諗過我會做得到呢件事，一路都缺乏呢個勇氣，我係連食飯都好少一個人，自己一個人去旅行得唔得㗎？今次係突破到自己，原來只要你想做就得，成功咗之後係好有滿足感。」講到社交平台與法國男仔合照，她笑言：「你講個BB呀！哈哈！」她認為若跟朋友同行，絕對影響此行交友成績：「同朋友去旅行，好少同其他人接觸同傾偈，但係一個人去旅行，係必須打開自己去同多啲唔同嘅人傾偈，可能要咁樣先紓緩到旅程裏面一個人嘅孤獨。」 愛親近小朋友的她，除了跟小朋友傾偈合照，還認識了佷多新朋友：「會同佢哋媽咪傾吓偈，幫佢哋影吓相，係打開咗我嘅人際關係網，識咗好多法國朋友，有做音樂嘅男仔，佢女朋友就係做手袋品牌嘅Marketin；仲有喺瑞士出發踩單車去南法嘅兩叔姪，佢哋70幾歲同60幾歲，都有邀請我一齊踩單車，如果我唔係有行李都好想加入。」她認為一個人旅行可以放空自己，想通了不少問題：「喺其他人身上可以睇到有其他嘅生活方法，其實生活係有得選擇，呢個都係今次旅程另一個得着。」 講到南法行可有艷遇，她表示：「我都好恨今次有艷遇，可惜冇發生到，都唔知點解。」她表明不介意異國戀：「我當然唔介意啦！緣分安排到係好樂意添！生個混血BB都幾好！」但要遠距離戀愛（Long D）則未能接受，她解釋說：「因為工作好忙，見面時間已經好少，如果仲要Long D嘅話，我會唔識得點樣去維繫感情，譬如有啲朋友想介紹男仔畀我識，佢哋話『識咗先啦，得閒先傾吓偈囉』，其實我係唔叻用Message傾偈，會唔知道要講啲乜嘢，覺得好奇怪，所以未必好鍾意Long D。」她又指現在工作忙是常態，要製造艷遇機會並不容易，預計下次放假去旅行要等到下年：「如果到時真係得閒嘅話，我會Join蘇民峰師傅去滑雪，因為佢每年新年期間都去北海道滑雪，佢話北海道嘅雪係最靚。」