爾冬陞認金像獎參賽片源出問題 擔心用公帑搞惹不滿

身為香港電影金像獎協會董事局主席的爾冬陞（小寶），今日（25日）出席自己監製的新片開鏡。當被追問到早前演員張繼聰曾表示擔心電影開拍數目下跌，片源問題令金像獎有朝一日可能未能繼續下去，小寶坦言：「過去兩年其實我哋一直關注緊呢件事，因為我哋都問政府申請撥款，政府錢即是納稅人嘅錢，依家財赤我哋仲問撥款，我都聽到有唔少人唔開心，用公帑搞呢個活動，覺得愈嚟愈冇代表性，加上以前電影興旺帶動到出口市場，依家唔係嗰回事！」 他表示曾粗略估計，直到年底今年相信僅有40套電影推出：「今年都仲可以（片源），仲搵咗導演吳煒倫做總監，我哋嘅製作班底都好強，嚟緊呢兩個禮拜會開會傾，相信今年政府撥款唔會好似以前咁爽手，我哋要努力作出減省。我想同啲行家講，大家冇使過一毫子，咁啲錢喺邊度嚟㗎？咪靠政府同贊助囉，如果搵唔到嘅話要縮規模，大家要理解呢件事，我哋手頭上都有啲方案嘅，好似唔喺文化中心搞咪去酒店，如果係咁就會被提名者優先，喺我心目中佢哋同頒獎嘉賓係最大，咁容納唔到全行參與，呢啲訊息會公開畀大家知！」不過小寶相信今年暫還可以照舊於文化中心舉行盛會。 至於2027或遇上現實的電影片源問題：「我當然唔希望有咁嘅情形出現，不過依家發展到電影發展基金已經係最大嘅老闆。今年係我入行50周年，但係我見到香港電影最低潮嘅一年，我驚緊出年可能仲有得低。呢個唔係創作同製作嘅問題，係市場同資金嘅問題，如果同其他經濟一樣再拖落去就係陰乾！已經有好多電影工作人員流失咗，但始終有新血加入，依家啲年青人好捱得，克苦嘅狀態非常專業，我又覺得係改朝換代嘅時候嘞，畀啲空間年輕人，我好鼓勵啲年青導演自己投資或者搞發行，我同好多前輩都諗啲辦法幫佢哋，中間可能有三幾年比較難難打啲，但新一代嘅力量會出現！」