袁澧林公開生日願望 胡杏兒忙到爆未約胡定欣食飯

藝人袁澧林與胡杏兒於新片《第四幕》都與男主角馮德倫有感情瓜葛，前者曖昧關係，後者則是前度。今日開鏡禮上，兩人惺惺相惜，影大合照時互推C位，當袁澧林要吹生日蠟燭時，杏兒嘅主動幫對方接過花束。 被問到生日願望，袁澧林說：「我手頭上有兩套拍咗4年嘅戲，希望可以快啲推出，驚個樣唔同咗嚇親觀眾，同埋想呢套戲拍攝順利。（今晚諗住點慶祝？）啱啱先知可以收8點，即刻約咗好朋友食飯。（追求者？）冇呀，邊度有咁多人追吖？依家工作好忙。（今次拍攝有咩難忘嘢？）最難忘係可以企上演藝學院個台，劇情交代舞台劇嘅部分，仲有導演專登幫我哋排咗戲先。」 杏兒透露今次於戲中扮演資深舞台劇演員，可謂演回老本行。談到好友胡定欣新婚返港，她笑指工作太忙依然未約實飯局：「費事轟炸佢，相信好多朋友都搵緊佢嘛，我諗佢Settle Down嘅話，會約我哋出嚟，好朋友要畀啲空間佢，不過佢老公好好，令我哋讚不絕口。（李施嬅真係同前度復合？）唔知，不過佢嘅前度都係一個好人，佢哋可能相處上唔係咁夾，但唔代表係衰人，都係畀啲空間佢啦。」至於李施嬅投訴前度帶朋友返家留宿，還要睡她的床，杏兒聞言語窒，袁澧林見狀即待解圍：「咁我可唔可以去你屋企瞓一晚？如果可以嘅話，煞科嗰晚就去啦。」杏兒笑答：「你嚟緊係得啦，我幫你換埋床單添呀！（咁你老公瞓邊？）瞓廳囉，帶朋友返屋企瞓，尊重都係要講聲嘅，可能做少咗一步。」