游嘉欣密冚戀事逃避見光死 心儀高大圈外人

藝人游嘉欣（游游）入行7年，回想當初，她坦言曾有意參選港姐，志在改變內斂性格，後來誤打誤撞入行，邊讀大學邊兼職幕前，直至拍了無綫劇集《香港愛情故事》才找到自己的方向，立志成為演員。說到收入，她坦言：「我未入行前做過好多兼職，一直有儲蓄習慣，所以入行初期還好，可以交到學費同足夠應付基本生活，入行後雖然冇以前做兼職賺咁多，但我覺得青春得呢幾年，點解唔拚搏咗先，而且我有大學學位，將來跳番出嚟都仲可以，幸好入行以來好多工作機會。」 同林正峰有默契 談到愛情，游游向來有「A0女神」之稱，她直言很想搣甩標籤：「我好後悔，當初入行公布咗自己個感情狀況，覺得呢樣嘢好尷尬。相信大家鍾意我唔係因為我係A0，而係因為我拍過嘅綜藝、演過嘅角色同性格，呢個標籤冇必要跟住我，我亦冇必要將感情狀況公開畀大家，總有一日我唔係呢樣嘢，到時我都唔想公布畀大家知。」問到是否結婚才會公開？她表示若雙方感情穩定，有意再往下一步，對方又不介意的話才考慮公布：「好驚講完撻Q，而且我好受人影響，如果好多人評價我嘅私生活，我會有啲在意。」 提到緋聞男友林正峰，她表示若再演情侶不會尷尬：「我同佢太老友，入行合作得最耐係佢，同佢有默契，做螢幕情侶都唔錯。」至於擇偶條件，她稱要有耐性及比她高，又坦言傾向跟圈外人拍拖：「唔係好想對方同我做同一個行業，因為圈子太近，內心有啲抗拒。」不過，她自言比起拍拖，現階段更着急事業發展，因為青春有限，望早日做出成績。