陳瀅擇偶首選狗奴 婚後生夠3個

女神陳瀅家中有3隻寶貝愛犬，為她增添生活動力。對「3」字情有獨鍾的她，直言日後成家立室都想生足3個，且揚言另一半一定要「愛屋及烏」，認真愛狗如命！ 藝人陳瀅愛心澎湃，即使日常工作再忙，對家中3隻愛犬Kumo、Baymax及Whiskey都貼心照顧及疼錫非常，自組「溫馨小家庭」。每天早上出門前與小狗的互動時光，都令她深感溫暖：「其實同佢哋嘅相處，雖然講唔出特定事件，但所有點滴都好難忘，我好珍惜㗎。」她更希望不久將來，能夠成功申請帶牠們遊歷世界去旅行，為彼此增添更多美好回憶。 外表開朗的陳瀅，原來去年因為另一隻愛犬Diesel的離世，沉鬱了好一段日子：「佢係患癌症走嘅，知佢有病我梗係唔開心啦，當時盡量煮多啲佢鍾意食嘅嘢畀佢，有時佢食唔落會嘔，我就嘗試用針筒餵佢。後嚟我要拍《痞子無間道》，佢就入咗醫院留醫，一有時間我就去探佢，醫院方面好好，唔使我限時限刻探病，仲要每次我去到，就喺角落間開一個位，畀我喺裏面抱住Diesel瞓覺。」 出街心掛掛 最終Diesel依然不敵病魔離世，但當時已達16、7歲「高齡」，算得上頤享天年，陳瀅坦言：「佢走嗰刻我係最難受嘅，惟有諗佢去咗個更加好嘅地方，咁嘅想法真係令我冇咁傷心嘞。」而Diesel離去約大半年後，陳瀅鼓起勇氣為家中再添新成員Whiskey，只因她對「3」字情有獨鍾：「真係唔知點解，想Keep住3隻，可能我屋企都係3姐弟，我諗第時我結婚，都想生3個，同埋養狗我就會揀囝囝嚟養囉！（結婚對象一定要好鍾意你啲狗仔啦。）冇錯，佢好難唔鍾意喎。」 陳瀅不時放假返回「老家」加拿大，卻不捨得送3隻小寶貝暫住狗酒店，幸而好友肯捱義氣幫忙照顧：「佢會暫時搬嚟我屋企住，專心幫我湊狗，真係好暖心。其實只要我喺香港，即使幾忙、或者出咗去玩都好，點晏我都一定會趕返屋企，真係會心掛掛㗎！」