魏浚笙孖林愷鈴合作 爆2人初見面趣事

藝人魏浚笙（Jeffrey）、林愷鈴（Ashley）、女團COLLAR成員許軼（Day）及蘇雅琳（Ivy So）今日（27日）現身ViuTV節目巡禮。 Jeffrey跟Ashley有劇集《地獄大狀》推出，Ashley透露劇中有奇幻元素，飾演大狀的她要來回地獄人間，當中更有不少動作場口：「我都估唔到，點睇都係Jeffrey打，但原來係我打。」同時還有感情戲的2人，不乏攬攬錫錫等親密鏡頭，Ashley爆料說：「第一次見面時，佢問我幾多歲，佢以為我大過佢，其實我係細過佢。」Jeffrey即解釋：「因為你個樣比較成熟，我身邊啲朋友都大過我，好少識得細過我嘅朋友。」Ashley續指：「第二日拍攝，佢睇住個Mon話你個樣真係似30幾歲。」Jeffrey不得不再次解釋：「因為佢個角色係30幾歲，我係稱讚佢，貼合個角色。」不過，Ashley坦言當刻聽到這番說話感開心：「因為劇組同導演初時都有少少質疑我演唔演到呢個年紀嘅角色，聽到Jeffrey咁講，係派咗好大嘅定心丸畀我，所以係好開心。」 提及早前Ashley以逾500萬購入大坑物業，問她日後是否要為供樓而多接工作？她坦言自己也有點「淆底」：「我早入行儲咗啲錢，買樓係一個學習機會，我好鍾意香港，置業就係一個決心，雖然淆底都做咗先。（有冇叫媽咪幫手？）冇，我都算係好幸運。（有冇諗住細屋換大屋？）冇諗太多，媽咪教落有錢就買樓，呢個係學習理財嘅好方法。（咁媽咪係咪有好多物業？）咁你就要問番佢，我都唔肯定。」至於Jeffrey可會效法對方置業？他坦言將所有錢投資在新歌上：「我會努力推出多啲新歌。（你咁係燒錢？）冇辦法，獨立歌手就係要投資，但係開心嘅，推出歌曲係自己的里程碑，所以要努力賺錢。」 同場的Day及Ivy So分別有劇集及綜藝推出，Day透露在劇集《日落下的彩虹》中飾演唐詩詠及潘燦良的女兒，她坦言：「拍住兩位大前輩，好期待又緊張，我知道要演唐詩詠個女都好震驚。（有冇睇過佢演嘅劇？）當然有。（覺唔覺得佢演你媽咪太年輕？）劇中講我哋關係似兩姊妹，所以都好合理。」而劇中她會有感情線，但仍未知誰人飾演其男友：「導演仲物色中，我冇所謂，總之愈靚仔、愈高大愈好。」她透露今次是相隔兩年再拍劇，幸好早前上了演藝課，希望演技會有所進步。 而Ivy So則主持遊戲綜藝《骰界》，她稱要在節目中鬥智鬥力贏取獎金獎品：「我智力係冇問題，但我輸在唔識出茅招，一齊玩嘅有193，你知佢好唔守規矩，我哋COLLAR平時太乖。」Day自薦出手相助，但Ivy指對方不可靠，寧揀另一成員Gao幫手。另外，提到Ivy So近日在社交網首次曝光弟弟靚仔樣及社交帳號，網民揣測弟弟有意入行，她直言：「我都想佢出道，叫咗佢好耐，不過佢話等佢學咗唱歌跳舞先。佢今年21歲，依家讀緊大學，我之前叫佢參加《全民造星》，不過當時佢要考試，希望佢下一季參加。」又笑言不介意出錢栽培對方，及可當對方經理人：「我一直有供養佢，希望佢將來可以賺錢回饋我。」Day即時搭訕：「唔好益公司，你可以同佢對分啲錢。」非常搞笑！