姜濤包機票酒店請英國粉絲睇騷 MIRROR隊友起哄求包養

男團MIRROR今日（27日）出席ViuTV節目巡禮，他們在尾聲時獻唱《DAY 0》及《BOSS》，炒熱全場氣氛。其中成員邱士縉（Stanley）與楊樂文（Lokman）同有3劇待播成為劇王，Stanley有《COURT！》、《日落下的彩虹》及《IT狗2.0》，而Lokman則有《地獄大狀》、《存酒人》及《IT狗2.0》，陳瑞輝與邱傲然（Tiger）也各有一劇。成員們即時尊稱Stanley與Lokman為邱視帝及楊視帝，其他冇劇拍的成員自認只是市民，相當抵死！ Stanley表示多謝公司提攜，講到被稱為視帝？他說：「唔係啦，我好開心有咁多練習機會，可以好多實踐嘅機會。」Tiger稱開心在劇集《存酒人》機會跟前輩學習，問到拍攝時是否要飲好多酒？他說：「冇，只係道具。（你好鍾意飲酒？）唔係，我控制到。」不過其他成員踢爆他平時飲得多，笑言：「係啲酒好鍾意畀佢飲。」Lokman補充指稍後大家會有團綜拍攝。 另外，談到姜濤在社交網中主動向一位住在英國的粉絲表示會請對方觀看其演唱會，他坦言：「已經聯絡嗰位粉絲。（只係送飛畀嗰一位？）睇緣分，點解係嗰位，因為打開個軟件時第一眼見到佢嘅post，係一個緣分同想起小時候自己冇條件去睇自己鍾意嘅偶像演唱會，希望自己成為呢個職業時，希望畀粉絲知道我哋唔係咁遠距離，都係普通人，希望可以幫到支持自己嘅人。（你會包機票同酒店？）都係，差唔多。」其他成員聞言即起哄叫姜濤包他們食宿。問到會否倣效Anson Lo將部分演唱會門票用作慈善？他指不止演唱會，平時也有積極行善：「都係等演唱會公布後，睇吓公司同後援會安排，我哋都係專注好自己就得。」 至於網傳盧瀚霆（Anson Lo）的演唱會門票，並非如公司所言已經售罄，對於被指「假售罄」？Anson Lo謂：「我未聽過，有傳即係唔係真，冇comment。（有冇影響心情？）唔會，因為係傳聞，唔會畀傳聞影響心情，都係做好自己嘅表演，依家加場，得番一個月時間好緊迫，自己好緊張。（有信心可以賣晒所有飛？）都係專注自己表現，賣飛情況係自己控制唔到，賣飛就交畀命運、觀眾、粉絲同神徒。（你準備好肌肉未？）準備好。（你之前游水騷咗少少肌？）係，因為要練氣，演唱會有8、9成跳唱，都幾驚唔夠氣，以前只係跑步，依家游埋水練氣。（吸引好多人去睇你游水？）冇呀。（你包場游水？）我正常市民咁去游水。」 而呂爵安（Edan）主演的韓劇《模範的士3》下月開播，今日推出新宣傳片，他直言：「感覺都幾神奇出現喺韓劇入面，初接拍時比較震驚，依家拍晒等出街比較緊張，自己喺劇中講英文，但我英文唔係好叻，所以有啲緊張。（使唔使去韓國宣傳？）唔使，只係喺香港宣傳。」又笑指宣傳片只出現了自己的側面一秒，但只算是較靚仔的一個鏡頭。 至於陳卓賢（Ian）在電台只有一首歌登上冠軍榜，預計無緣成為叱咤男歌手三甲，對此他揚言：「我好少留意，我做歌唔係為獎，大家鍾唔鍾意首歌有主觀想法，作為創作人，最重要係自己想法同信息放入自己嘅歌，大家肯去聽已經好開心。（滿唔滿意點擊率？）我冇睇。」