高海寧憶許紹雄爆喊 馬國明蟬聯「劇王」

藝人高海寧（高Ling ）及馬國明今午盛裝亮相無線台慶節目巡禮，高Ling以黑色大露背晚裝登場，相當搶鏡。她主演4套劇集包括《飛常日誌II》、《武林》、《夫妻的博弈》、及《璀璨之城》，而馬國明則負責擔演《飛常日誌II》、《夫妻的博弈》及《玫瑰戰爭》，其中兩套劇兩人合作，難怪高Ling笑言：「今日全日跟住馬國明就好有安全感，公司應該加個螢幕情侶或者黃金組合獎，咁我哋就有機會攞啦。」 雖然工作相當繁忙，但兩人異口同聲表示相當樂意，高Ling感激公司及監製給予機會，而馬國明則坦言因為開劇機會較以前少，故分外珍惜，目前身兼兩套戲要香港深圳來回走，換來一臉攰容也覺得不是問題。至於另一新劇《璀璨之城》因劇本問題而停拍了一段時間，高Ling透露：「收晒劇本啦，已經安排晒行程，應該11月頭就開工。（之前拍落嗰啲仲用唔用得番？）咁要睇監製同導演嘅安排，劇情相同應該可以用得番。我角色變動較少，其他人就多啲變動，不過劇情方面更加吸引。（係唔係趕唔切今年推出？）應該出年啦，我哋拍到明年一月，農曆年可以放假。」 談到已故意前輩許紹雄，高Ling即時情緒崩潰，眼淚滾滾落下，幾乎說不出話來，聲音震動回應：「昨日去咗見佢，係突然嘅，好感恩呢世遇到佢。我成日演佢個女，所以私底下我叫佢老竇⋯」緊接語窒，馬國明接口：「記得我啱啱出嚟，演技幼嫩俾Benz哥鬧，佢問我依家我鬧你，係咪好過第二日俾觀眾鬧呢？所以我做訪問成日同人講，佢其實係我偶像，我想學佢拍戲之餘唔好咁多應酬，專注做好演員嘅工作，一個咁好嘅前輩走咗真係好可惜。」