江嘉敏兩個月前曾搵「爸爸」許紹雄 昔日常車自己放工

藝人江嘉敏今日（29日）現身灣仔出席腦中風活動，她笑言一開始不知道為甚麼會被邀請，但經過了解後發現腦中風已經年輕化，即使18歲亦有機會患上，但也能有80%機率可以預防，所以認為邀請自己的原因，是自己以前的形象是經常生病，加上飲食習慣差和缺乏運動，但現在的她已經改過自新，努力運動甚至參加跑步比賽，可以鼓勵更多人。 江嘉敏續指自從做運動後，生病的次數大幅減少，同時亦減輕了體重，以前返工需要進食很多重口味食物，但現在不用返工的日子，就會在家食烚雞胸、雜菜及青瓜等。提到她打風時派福利照，她就解釋：「我一忙就好少玩社交平台，咁一打風休息咪多啲時間玩，可能就揀番啲靚相出嚟同大家分享吓。（一打風就會甫？）但係都要睇吓有冇存貨先，啲存貨7788。」 而提到她在無綫的劇集存貨，她表示印象中尚有4套，如《非常檢控觀》、《無份之罪》及《香港重案》等，問到會否怕隔太久播放與現在形象有所不同，就像近日在熱播的《金式森林》中她被網民評論身形肥，她直認當時拍攝的身形確實與現在不同，但更令她太驚訝的是，很多觀眾不知道拍攝完劇集需要很多時間做後期，即是有段時間才會播出：「好多人都有提問，佢唔係離開咗TVB啦咩，點解仲喺TVB度出現，我覺得幾有趣，因為你唔係做呢行，就唔知呢行點去運行。」 至於資深演員許紹雄日前離世，曾在劇集《誇世代》中與他飾演父女的江嘉敏，大讚他是一個好爸爸：「因為我哋套劇都拍咗半年，佢又知我係住佢附近，佢會check我通告，見我同佢同場，佢會專登朝早同我講『阿女你唔好揸車啦，今晚收凌晨五六點，女仔揸車危險呀爸爸車你返屋企』，我覺得呢樣嘢好窩心，即係一個前輩冇需要咁做。」 她又憶述兩人對上一次聯絡是兩個多月前，當時她與一群好友食飯，其中包括許紹雄女兒許蕙菁，她就向對方笑言：「其實你爸爸就係我爸爸，不過可能你爸爸都唔記得我啦，因為淨係合作過一次」，許蕙菁即致電爸爸讓江嘉敏對話：「我話我係江嘉敏，你認唔認得我？『梗係記得你啦，日日叫我車你放工』我就撒嬌話順路咋嘛，佢話『唔順路啊，我要用多1分鐘車程車你』，我覺得有佢喺度嘅時候就係充滿笑聲同歡樂，希望佢依家去咗嗰個冇病冇痛嘅地方，可以開開心心咁做住臥底，去一個新地方幫我哋視察環境，等我哋第日相遇再交換情報。」